“Skënderbeu – një histori politike” e autorit Aurel Plasari dhe “Shqipëria e rigjetur” me autore Lucia Nadin, ishin veprat fituese të çmimit shkencor për Gjergj Kastriotin – Skënderbeun dhe epokën e tij, nga autorë shqiptarë dhe të huaj, në kuadër të Vitit Mbarëkombëtar të Gjergj Kastriotit – Skënderbeut.
Në ceremoninë e zhvilluar në Akademinë e Shkencave, ku u dhanë dhe çmimet, ishte i pranishëm dhe Kryeministri Edi Rama, i cili në fjalën e tij u shpreh se “Kjo veprimtari duhet parë me mirënjohje, mbi të gjitha për autorët që i kanë përkushtuar kohë dhe energji, angazhim figurës së Skënderbeut. Një lëmë ku, e vërteta është se kemi shumë prapambetje. Më vjen shumë mirë që Viti Mbarëkombëtar i Skënderbeut vlen si një lloj sebepi për t’i nxjerrë në pah veprat dhe autorët e tyre dhe për të dhënë një shenjë kuptimplotë që pavarësisht varfërisë që ka pllakosur gjithë terrenin e veprimtarisë shkencore pas shthurjes së kësaj akademie, mbetet shpresë”.
Juria, e përbërë nga akademikët e studiuesit Luan Starova, Mateo Mandala, Shaban Sinani dhe Rezvan Teodorescu, çoi në finale 6 vepra dhe 6 autorë, mes të cilëve tre studiues të huaj e tre shqiptarë: Lucia Nadin, Oliver Jens Schmitt, José Manuel Floristán Imízcoz, Aurel Plasari, Kasem Biçoku e Petrika Thëngjilli. Pas një prezantimi të të 6 veprave nga vetë autorët apo në mungesë të tyre, nga studiues të tjerë, kryetari i jurisë, dr. Pëllumb Xhufi, bëri me dije edhe emrat e fituesve.
SHPALLJA E VEPRAVE FITUESE:
Fituese e çmimit për veprën më të mirë shkencore kushtuar figurës së Gjergj Kastriotit – Skënderbeut, shkruar nga autorë shqiptarë, u shpall vepra: “Skënderbeu – një histori politike”, e autorit Aurel Plasari. Ishte akademiku Luan Starova që lexoi motivacionin: “Vepër me origjinalitet shkencor dhe rëndësi metodologjike, kushtuar figurës së Gjergj Kastriot Skënderbeut dhe epokës së tij, që shërben si një model për zgjerimin e pikëvështrimeve dhe trajtime të munguara rreth kësaj figure, rreth përmasave arbërore dhe europiane të tij, duke e vendosur veprimtarinë e tij në kontekstin e humanizmit të Rilindjes Europiane”.
Fituese e çmimit për veprën më të mirë shkencore kushtuar figurës së Gjergj Kastriotit – Skënderbeut, shkruar nga autorë të huaj, u shpall vepra: “Shqipëria e rigjetur”, e autores Lucia Nadin. Akademiku arbëresh Mateo Mandala lexoi motivacionin: Vepër me karakter origjinal që certifikon tipologjinë europiane qytetërimin arbëror, duke provuar shkallën sinkronike të zhvillimit lëndor dhe shpirtëror të botës shqiptare në shekujt e humanizmit, me dukuritë dhe prirjet zotëruese në arealin adriatik dhe mesdhetar. Për meritat jetësore të autores, që ka krijuar modelin e kërkuesit pasionant e ngulmuese për brezat e studiuesve të rinj”.
Çmimi iu dorëzua nga Kryeministri Edi Rama. Duke shprehur falënderimet e rastit, studiuesja Lucia Nadin u shpreh se: “Jam krenare të paraqes Shqipërinë e kulturës, të historisë, Shqipërinë e bukur, për ta çuar drejt Italisë, në veçanti në Venecia, ku ka shumë kujtime të vendit tuaj. Gjithmonë e kam konsideruar punën time si një rikthim të kujtesës te njerëzit dhe vazhdoj të punoj për emigracionin e shumë shekujve më parë, të shumë shqiptarëve që janë zhvendosur në Italinë e Veriut, që kanë shkruar faqe të rëndësishme, duke demonstruar se ishin dëshmitarë të një vendi me histori dhe kulturë, që kishin lënë pas. Dhe si ata kaluan Adriatikun, unë po bëj udhëtimin e kundërt, duke sjellë në Shqipëri, një pjesë të veprës që ata kanë shkruar”.
PANORAMA
NDIQE LIVE "PANORAMA TV" © Panorama.al