Të mbash gjallë pasionin gjatë martesës mund të mos jetë e lehtë. Një 48-vjeçare tregon për “Dear Deidre” të “The Sun” se debatet me bashkëshortin e shtynë të niste një lidhje të re me një shok të vjetër nga universiteti, i cili gjithashtu është i martuar.
Mirëpo, pasi gjendja e saj financiare u përkeqësua, i dashuri nisi ta shantazhonte se do t’i tregonte bashkëshortit të saj nëse nuk i jepte para. Ja rrëfimi i plotë i saj:
“I dashuri im po më shantazhon. Ai thotë se nëse nuk i jap mijëra paund, atëherë do t’i tregojë burrit tim për lidhjen tonë.
Unë jam 48 vjeç dhe kam 20 vite e martuar me një burrë 50 vjeç. Ne kemi dy djem binjakë që janë adoleshentë. Edhe pse martesa në të shumtën e kohës ka kaluar mirë, vitet e fundit kemi pasur shumë mosmarrëveshje dhe debate. Më duket sikur burri më merr si të mirëqenë dhe jam më shumë si mamaja, sesa gruaja e tij. Jeta jonë seksuale ka marrë fund.
Dy vjet më parë, një shok i vjetër nga universiteti, i cili është 47 vjeç, më kontaktoi përmes ‘Facebook’. Filluam të bisedonim dhe ramë dakord të takoheshim. Ai më ndoqi, më bëri të ndihem përsëri tërheqëse dhe e dëshiruar, prandaj filluam një lidhje bashkë. Ai gjithashtu është i martuar.
E dija që ishte diçka e gabuar dhe u përpoqa disa herë që t’i jepja fund gjërave, por gjithmonë kthehesha tek ai. Pastaj gjërat morën një rrjedhë tjetër. I dashuri është keq nga ana financiare. Ai filloi të më kërkonte para hua. Në fillim ishin shuma të vogla por pastaj, nisi të më kërkonte mijëra paund.
Unë i thashë se nuk ndihesha rehat duke e bërë këtë, por më bëri presion. Kur fillova ta kundërshtoja, kuptova se atij nuk i interesonte fare.
I kam dhënë 15,000 paund deri tani, por ai vazhdon të kërkojë gjithnjë e më shumë, dhe më ka lënë të kuptoj se nëse i them ‘jo’, burri im do të mësojë gjithçka për ne. Edhe nëse largohem nga shtëpia, nuk do të jem në gjendje që t’i rikthej paratë dhe nuk e di se si mund t’ia shpjegoj burrit tim këtë. Jam shumë në ankth.”
“Dear Deidre” thotë:
“Ky njeri ju ndoqi. Ai është një manipulues dhe i rrezikshëm. Ai duket se nuk ka ndjenja dhe as ndërgjegje. Nëse vazhdoni kështu, gjërat do të përkeqësohen. Ju duhet t’i jepni fund lidhjes me të.
Mos harroni, ai është gjithashtu i martuar. Jini e prerë kur t’i thoni se do të ndaheni prej tij. Bllokojeni atë në mediat sociale, në telefon dhe në e-mail. Nëse ai thotë se do t’i tregojë bashkëshortit tuaj, thuaji që do të shkosh në polici. Shantazhi është kundër ligjit. Ndërkohë, duhet t’ia rrëfeni të gjitha bashkëshortit tuaj”.
NDIQE LIVE "PANORAMA TV" © Panorama.al
