Në mbledhjen e Këshillit Kombëtar të Integrimit, kreu i grupit parlamentar të Partisë Socialiste, Taulant Balla, tha se integrimit evropian i vendit kërkon bashkëpunim të gjithëanshëm.
Sipas tij, jemi në një moment të rëndësishëm pasi pritet të vendoset se kur do të mbahet konferenca e parë ndërqeveritare, e cila shënon zyrtarisht nisjen e procesit për anëtarësim në Bashkimit Evropian.
“Kjo mbledhje zhvillohet në një moment të rëndësishëm të rrugës sonë evropiane. Jemi në prag të marrjes së një vendimi për mbajtjen e konferencës së parë ndërqeveritare. Ky këshill i takon të përcjellë një mesazh inkurajues për këtë proces jetik.
Sot do të njihemi me njërin prej kapitujve, atë 23, i cili së bashku me atë 24 kanë rëndësi të veçantë. Duke pasur parasysh edhe rolin dhe lidershipin e Këshillit Kombëtar të Integrimit, synojmë që të rritet sa më shumë transparenca dhe llogaridhënia.
Kuvendi duhet të marrë rolin që i takon, atë të kontrolluesit të institucioneve të tjera. Kuvendi ka shërbyer si urë lidhëse mes institucioneve të përfshira në integrimit evropian. Kuvendi do të monitorojë zbatimin e planit të veprimit. Secili prej institucioneve ta lexojë me vëmendje planin. Nuk mund të pretendojmë, dhe është qasje e gabuar, nëse mendojmë që vullneti i mazhorancës dhe qeverisë është i pamjaftueshëm, duhet të jemi bashkë”, theksoi Balla.
Kryetarja e Komisionit, Rudina Hajdari, përmendi raportet ndërkombëtare sipas të cilës tregojnë përkeqësimin e situatës së korrupsionit në vend.
“Indeksi i korrupsionit shënoi sërish përkeqësim. Sipas TIA, Shqipëria ka humbur 7 vende nga viti 2019. Raporti i DASH për klimën e investimeve për vitin 2020, e citon Shqipërinë si një nga vendet e vështira për të bërë biznes. Shqipëria është përfshirë sërish në listën gri për pastrimin e parave. Ne jemi i vetmi vend në rajon pa një Gjykatë Kushtetuese dhe një Gjykatë të Lartë, i cili po thuajse nuk ekziston.
Referuar reformën zgjedhore është kryefjala e takimeve të mbajtura së fundmi. Duke vlerësuar vendimin e Këshillit Evropian për hapjen e negociatave, është vetëm nisja e një rrugëtimi shumë të gjatë”, tha ajo.
Zonja Hajdari tha se institucionet nuk kanë kompetenca të qarta për procesin e integrimit. “Plani i veprimit ka ardhur sërish në Kuvendin e Shqipërisë. Detyra jonë është që të biem dakord për këtë plan veprimi. E dyta, dua të tërheq vëmendjen për diçka tjetër. Ajo që mungon është një rregullore e brendshme se si organizohet dhe se si burojnë detyrat e secilës drejtori për të menaxhuar këto raporte. Do ishte e udhës që çdo institucion apo ministri të ketë rregullore të brendshme, në mënyrë që të kuptojmë kush i ka këto kompetenca”, theksoi ajo.
Fjala e plotë e Taulant Ballës:
Jam veçanërisht falenderues për takimin e sotëm për shkak të momentumit në të cilin ndodhet Shqipëria në rrugëtimin e saj drejt BE-së. Jemi në prag të publikimit të raportit nga Komisioni Evropian për Shqipërinë dhe po ashtu te marrjes së vendimit për mbajtjen e Konferencës së Parë Ndërqeveritare. Ketij keshilli I takon te percjelle nje mesazh që Shqiperia vazhdon të jetë i ankoruar në projektin historik, pikërisht atë të integrimit në familjen evropiane. Dhe Kjo vendosmëri duhet të shoqërohet me një vetëdije të fortë në lidhje me sfidat që na presim dhe qe ne te gjithe ketu duhet të jemi gati për ti përmbushur per sektorin qe mbulojme.
Në linjë me këtë angazhim jemi mbledhur sot për t’u njohur me progresin e bërë në kapitullin 23 e cila do të detajohet imtesisht nga Ministrja e Drejtësisë. Kapitulli 23 së bashku me kapitullin 24 kanë një rëndësi të veçantë dhe jane determinante për të përcaktuar përparimin e një vendi në rrugëtimin evropian nese marrim nje tabele krahasuese me vende te tjera te angazhuar ne kete proces. Për këtë qëllim duke pasur parasysh rolin e KKIE-s si struktura më e lartë këshillimore kombëtare për integrimin europian synojmë që për tematika vendimtare si kjo e sotmja të rritet transparenca dhe llogaridhënia në vendimmarrjen e institucioneve përgjegjëse.
Të njëjtin synim ka edhe dokumenti për të cilin jeni ftuar të gjithe se bashku te diskutojnë dhe për të cilin do të kërkoja vëmendjen e anëtarëve të këtij Këshilli për shkak se kontributi i tyre ka qenë i vyer dhe i pazëvendësueshëm në arritjen e këtij version përfundimtar të Planit të Masave që kemi sot.
Realisht jo per subjektivizëm gjej rastin per tju falenderoj per sugjerimet e te gjithe institucioneve qe kane kontribuar. I referohem pikërisht komenteve të ardhura pas diskutimit të projekt-Planit të Veprimit, më 9 qershor 2020, në një mbledhje të zgjeruar të këtij Këshillit ku ishin të pranishëm te gjithe drejtuesit e shtetit Presidenti i Republikës, Kryetari i Kuvendit, Kryeministri, përfaqësuesit e institucioneve të sistemit të drejtësisë, përfaqësues të shoqërisë civile etj. Plani i Masave për përmbushjen e përparësive të përcaktuara nga Këshilli i BE-së ne mars te ketij viti duhet të shërbejë si një udhërrëfyes për të gjitha institucionet e përfshira të cilat do të duhen të raportojnë në Parlament në lidhje me punën e bërë në drejtim të realizimit të detyrave të lëna.
Për këtë qëllim më lejoni të vendos theksin në rolin parësor dhe të pazëvendësueshëm të Kuvendit te Shqiperisë në monitorimin e aktivitetit të strukturave shtetërore në përmbushjen e detyrimeve të procesit të integrimit. E theksova edhe e rithem sa herë më jepet mundësia në këtë Këshill, në një moment historik në të cilin ndodhet vendi, Kuvendi duhet të marrë rolin që i takon të kontrolluesit dhe të monitoruesit të institucioneve të tjera për përmbushjen e detyrimeve që burojnë nga procesi i integrimit.
Përpos kësaj, Kuvendi prej vitesh ka shërbyer si urë lidhëse mes aktorëve të përfshirë në procesin e integrimit dhe KKIE është një shprehje e këtij roli. Inkurajoj që në këtë faze sa historike po aq edhe sfiduese edhe delikate për vendin të nxisim zhvillimin e takimeve intensive në kuadër të KKIE apo edhe të Komisionit të Integrimit Evropian qe drejtohet po ashtu nga zonja Hajdari, për të përmushur detyrimin tonë ligjor në raport me procesin e integrimit. Kuvendi do të monitorojë zbatimin e Planit të Veprimit, duke inkurajuar veprimtarinë e institucioneve shtetërore dhe atyre të pavarura për të përparuar në kërkesat e vendosura nga Këshilli me synim përshpejtimin e procesit të anëtarësimit. Do te ishte mire qe secili prej institucioneve te shikonte mire planin sepse ka afate te mirepercaktuara.
Ky monitorim do të bazohet ne raportimin periodik nga institucionet përgjegjëse për zbatimin e masave të Planit.
Pavarësisht kësaj, siç mund të kuptohet edhe nga një analizë sipërfaqësore e planit të masave, përparësitë dhe institucionet përgjegjëse shkojnë përtej vullnetit të qeverisë apo aftësive monitoruese të Kuvendit. Integrimi Evropian është një rrugëtim kompleks që kërkon bashkërendimin e shumë aktorëve- qeverisë, Kuvendit, institucioneve të gjyqësorit, partitë politike, shoqërisë civile e deri tek qytetari më i thjeshtë. Nuk mund të pretendojmë dhe më lejoni ta theksoj që është një qasje totalisht e gabuar nëse do të mendonim që vullneti i qeverisë apo vetëm i maxhorancës (nëse doni) do të ishte i mjaftueshëm. Në këtë rrugëtim duhet të jemi sëbashku për të mundësuar avancimin sa më të shpejtë dhe të sigurtë në procesin e integrimit të vendit.
NDIQE LIVE "PANORAMA TV" © Panorama.al
