Bashkia e Vlorës nuk do të financojë më për futbollin. Në mbledhjen e zhvilluar dje, Këshilli Bashkiak miratoi buxhetin për vitin 2022. Fondi që kap vlerën e më shumë se 2 miliardë lekëve nuk kishte asnjë qindarkë për Flamurtarin dhe Orikun.
Duke qenë se ka hyrë në fuqi ligji i ri për sportin (që në korrik, në fakt), Bashkia e Vlorës nuk do të akordojë asnjë burim financiar për klubet e futbollit. Forma e vetme që i lejohet është ndërmjet sponsorizimeve, por jo nga buxheti i shtetit. Për Flamurtarin nuk ka asnjë të re në fakt, pasi prej 7 vitesh nuk marrin asnjë kacidhe. Gjatë kësaj kohe për klubin vlonjat investojnë kompanitë turke. Bashkia heq nga vetja edhe një tjetër “barrë”, siç është klubi i futbollit Oriku.
Bashkia nuk do të investojë për shpenzimet e planifikuara për ekipin, siç janë pagat e lojtarëve, sigurimet, ushqimi apo udhëtimet, por Këshilli Bashkiak, me kërkesë të bashkisë, miratoi dje që të mbështesë kërkesën e administratorit të Orikut për të investuar në terrenet sportive, duke bashkëpunuar me FSHF. Për këtë bashkia vendosi në dispozicion shumën prej 60 milionë lekësh të vjetër. Ndryshe nga vitet e kaluara, bashkia nuk i ka planifikuar Flamurtarit për vitin e ardhshëm shumën prej 10 milionë lekësh të vjetër për ndjekjen e procedurave të privatizimit.
ERMAL SIKA – PANORAMASPORT.AL
NDIQE LIVE "PANORAMA TV" © Panorama.al
