ETLEVA DELIA/ Vilson Tafçiu, i cili gjithashtu përdorte edhe mbiemrin Noka, nuk rezulton person me precedent penal në Shqipëri.
Kështu konfirmuan burime nga grupi hetimor mbrëmë pas verifikimeve që u kryen menjëherë pas vrasjes.
Megjithatë, nga verifikimet e kryera në sistem, 28-vjeçari rezulton të jetë deportuar nga autoritetet franceze më 6 nëntor të vitit 2018.
Sipas të dhënave që ka verifikuar grupi hetimor, Vilson Tafçiu rezulton të jetë larguar nga Shqipëria më 7 mars të vitit 2018 dhe ka qëndruar në Francë.
Atje është arrestuar disa ditë më pas, konkretisht më 12 mars 2018, pasi u kap duke shpërndarë lëndë narkotike.
Drejtësia franceze e ka dënuar me një vit heqje lirie, por pasi ka qëndruar 8 muaj në paraburgim, është vendosur që të deportohet në Shqipëri. Prej asaj kohe, nuk rezulton që ai të ketë udhëtuar më drejt vendeve të BE-së.
28-vjeçari u ekzekutua me armë zjarri mbrëmjen e djeshme në Tiranë, jashtë ambienteve të një lokali ku po pinte kafe me dy vajza.
NDIQE LIVE "PANORAMA TV" © Panorama.al
