Akti normativ i qeverisë për rishikimin e buxhetit të vitit 2015 dhe dy dekretet e kthyera të Presidentit Nishani do të jenë përballjet e para mes maxhorancës e opozitës në Kuvend për këtë sesion parlamentar.
Sipas projekt-kalendarit të propozuar paraprakisht për kryetarët e grupeve parlamentare dhe krerët e komisioneve në Kuvend është përcaktuar që, duke filluar që në seancën e dytë plenare, të diskutohen rishikimet që do t’i bëhen buxhetit të shtetit.
Seanca e parë, që do të zhvillohet të hënën e 7 shtatorit, deputetëve të Kuvendit do t’u shërbejë vetëm për t’u përshëndetur mes tyre pasi në të do miratohet vetëm kalendari trejavor i punimeve dhe do të përcaktohen synimet që ligjvënësit do të kenë për këtë sesion parlamentar.
Rifillimi i punës në komisione do të përballë maxhorancën edhe me oponencën e parë të fortë të demokratëve. Pas udhëzimeve të marra dje në mbledhjen e kryesisë nga kryetari Basha, deputetët e opozitës do të kundërshtojnë me forcë ndryshimet në buxhet që paraqet qeveria, duke nënvizuar edhe vjedhjen e 160 milionë dollarëve në Tatime e Dogana.
Ndërsa në javën e dytë të komisioneve, deputetët e maxhorancës do të votojnë edhe një herë dy dekretet e kthyera të Presidentit Nishani për ligjin e arsimit të lartë dhe atë për turizmin.
Realizimi i reformës në Drejtësi ka bërë që, krahas punës që do të zhvillojë Komisioni i posaçëm i Reformës në Drejtësi, qeveria të propozojë për miratim projektligjin “Për sistemin e vlerësimit të veprimtarisë së gjyqtarëve”.
JUXHIN MUSTAFARAJ
NDIQE LIVE "PANORAMA TV" © Panorama.al
