Liljana Mulliri, gruaja e burgosur për 25 vjet për masakrimin e një djali 7-vjeçar, përfiton ulje dënimi nga Gjykata e Tiranës. Pak ditë më parë, togat e zeza kanë vendosur të ulin me 45 ditë dënimin e mbetur ndaj shtetases Liljana Mulliri (Bora). Ajo tërhoqi vëmendje të madhe publike në vitin 2005, për shkak të krimit makabër që kreu ndaj nipit të të dashurit të saj.
Më 1 qershor të vitit 2006, e akuzuara është dënuar me vendim të formës së prerë me 25 vjet heqje lirie për akuzën e “vrasjes në rrethana rënduese”. Ajo është akuzuar në lidhje me masakrimin e fëmijës 7-vjeçar për shkak të konflikteve dhe mosmarrëveshjeve me xhaxhain e Alberto Xhihanit (viktima). Gjykata e Tiranës, në vendimin e uljes së dënimit për nënën vrasëse, është bazuar edhe te raporti që ka dorëzuar në seancë përfaqësuesi i burgut 325 në Tiranë ku mbahet aktualisht Liljana Mulliri.
Sipas dokumentacionit të burgut, në lidhje me dinamikën e vuajtjes së dënimit për Liljana Mullirin (Bora) deri më 22.07.2015, e dënuara ka zbatuar me korrektësi rregulloren e institucionit dhe nuk ka marrë masa disiplinore. Burgu 325 thekson se e dënuara ka krijuar marrëdhënie të mira me bashkëvuajtësit e tjerë dhe me personelin civil e policor të burgut. “Edhe me familjen ka kontakte të mira. Merr pjesë vazhdimisht në aktivitetet me karakter edukativ, kulturor dhe riintegrues që organizohen në institucion.
Është e punësuar në organikën e punës së burgut në rrobaqepësi dhe është konkluduar në këtë vlerësim sjelljeje se, gjatë periudhës që vuan dënimin, sjellja e saj ka qenë e mirë dhe institucioni është shprehur për pranimin e kërkesës së saj”, citon Gjykata dokumentacionin e burgut. Sipas dosjes së dorëzuar në Gjykatë nga Burgu, e dënuara ka vuajtur 14 vjet e 1 ditë dhe i kanë mbetur pa vuajtur 10 vjet, 11 muaj e 29 ditë burgim.
VRASJA E FËMIJËS
Më 30 nëntor 2005, Policia e Korçës bëri zbardhjen e autorësisë së krimit të vrasjes së fëmijës Alberto Xhihani. Krimi kishte ndodhur dy vjet më parë, në datën 04.09.2003, në fshatin Vidohovë, kur është konstatuar humbja e fëmijës Alberto Altin Xhihani, i lindur më 25.11.1995. Pas denoncimit të bërë nga familjarët në mbrëmjen e datës 04.09.2003, policia është vënë në kërkim të fëmijës, dhe ka kryer një sërë veprimesh, por nuk është bërë e mundur gjetja e tij.
Ky kërkim ka vazhduar për shumë kohë, por ngjarja mbeti e mbuluar me mister. Në datën 27.11.2005, rreth orës 16:00, Aishe Begolli, 36 vjeçe, ka gjetur në brendësi të pusit të saj një kufomë të dekompozuar, e cila i përkiste një fëmije të moshës nën 10 vjeç.
Eshtrat e kësaj kufome janë gjetur të ndara në dy thasë. Policia ka shkuar në vendin e ngjarjes dhe me një plan të detajuar ka punuar për të rindërtuar skeletin kockor, gjë që mund të përcaktonte nëse ishin pikërisht eshtrat e Alberto Xhihanit, si dhe të përcaktonte nëse mbi të kishte veprime me mjete prerëse.
Pas kryerjes së veprimeve hetimore u arrit në konkluzionin se ishte fjala për vrasje në rrethana cilësuese dhe pastaj në prerjen, copëtimin e trupit dhe paketimin në dy thasë plastmasi. Sipas hetimeve, dyshohet se Liljana Mulliri vrau Alberto Xhihanin, fëmijë 7-vjeçar dhe e hodhi në pus për shkak të lidhjes me ish-të dashurin e saj, Gentian Xhihanin, xhaxhai i fëmijës Alberto Xhihani.
Autorja e vrasjes kishte pasur mosmarrëveshje dhe xhelozi me partnerin e saj dhe në shenjë hakmarrjeje ka dëshmuar se i ka vrarë nipin. Më 29 Janar 2010, në fshatin Vidohovë të Korçës, janë vrarë Taulant, Xhiljan dhe Edi Mulliri, tre djem të Liljana Mullirit, por mendohet se ekzekutimi i tyre nuk kishte lidhje me ngjarjen për të cilin ishte dënuar nëna e viktimave.
TRAZHGIM SOKOLAJ
NDIQE LIVE "PANORAMA TV" © Panorama.al