Një debutim i mrekullueshëm me skuadrën e të rinjve në Turneun “Oberndorf” ka mjaftuar që Rei Manaj ta bindë trajnerin Roberto Mançini për ta ftuar në ekipin e parë.
Interi ka mbërritur ditën e djeshme në Itali pas ndeshjes miqësore me Gallatasarajin, zikaltrit kanë zbritur në qendrën stërvitore në Bruniko. Seancë në të cilën ka marrë pjesë edhe sulmuesi shqiptar i Kombëtares U-21.
Njoftimi
Ka qenë vetë Rei Manaj, i cili në një postim në faqen e tij zyrtare në rrjetin social “Facebook”, ka bërë me dije se ka marrë një ftesë nga trajneri i Interit, Roberto Mançini, për t’u stërvitur me skuadrën A.
“Ëndrra u bë realitet për t’iu bashkuar ekipit të parë në stërvitje në Bruniko. Seanca stërvitore është sot pasdite.
Forca Inter!”, ishte postimi i Manajt mesditën e djeshme. Një lajm me të vërtetë pozitiv për shqiptarin, që do të ketë mundësinë të fitojë akoma më shumë nga eksperienca e stafit stërvitor të zikaltërve, të drejtuar nga Roberto Mançini.
Një shans për sulmuesin 18-vjeçar që të tregojë aftësitë e tij dhe të mund të fitojë edhe të drejtën për t’iu bashkuar zikaltërve në ekipin e parë. Sulmuesi i Kombëtares U-21 është duke hedhur hapa cilësorë në karrierën e tij.
Në turneun miqësor që skuadra “Inter Primavera” fitoi, Manaj shënoi në ndeshjen çerekfinale dhe i dha fitoren skuadrës së tij kundër Evertonit në gjysmëfinale. Dy gola në tri takime e kanë bindur Mançinin që t’i japë një mundësi për t’u stërvitur me zikaltrit në Bruniko.
NDIQE LIVE "PANORAMA TV" © Panorama.al