Shqipëria u mposht mbrëmjen e sotme në “Velodrome” 2-0 në minutat e fundit, pavarësisht se bëri një lojë të mirë për rreth gati 90 minuta.
Djemtë e De Biazit e kërkuan golin, duke shpërdoruar të paktën 5 raste të mira, por ishin francezët ata që në fund triumfuan, duke u treguar të duruar dhe duke shënuar dy gola në fundin e ndeshjes me Grizman dhe Paje.
Megjithatë, kualifikimi ende nuk është mbyllur. Shqipëria duhet të mposhtë Rumaninë në ndeshjen e fundit që të pretendojë për një kualifikim mes të tretave më të mira, prej të cilave dalin katër nga gjashtë.
Pjesa e parë
Shqipëria ka treguar një lojë të mirë në pjesën e parë të takimit. Ishin francezët ata që rrezikuan të parët, por më pas kuqezinjtë morën situatën në dorë.
Ata ndërtuan aksione të shpejta kundërsulmi. Vlen për t’u përmendur rasti i Sadikut, kur merr një top në krah nga Lenjani, por nuk arrin ta shtyjë dot në portë.
Më pas, një goditje këndi e ekzekutuar ultas me skemë gjen Lenjanin në qendër të zonës franceze, por goditja e tij nuk është e saktë.
Kuqezinjtë e mbyllin pjesën e parë në sulm, ku Memushaj merr një top nga goditja e këndit por nuk godet si duhet.
Francezët rrezikojnë më shumë me Paje, por ai bllokohet dy herë nga Ajeti.
Pjesa e dytë
Në të dytën kuqezinjtë janë më kërkues, po aq sa edhe francezët. Këta të fundit rrezikojnë me Zhiru, i cili nuk është i saktë me kokë.
Kuqezinjtë kanën një tjetër rast mjaft të mirë kur një kros i Hysajt gjen Memushajn brenda zonës. Ky i fundit godet keq dhe gjen vetëm shtyllën.
Pas kësaj, nisin kundërsulmet e Francës. Zhiru kap një top në ajër mjaft të mirë brenda zonës dhe gjen vetëm shtyllën.
Futja në lojë e Xhakës dhe Roshit i jep më siguri De Biazit në sulm. Roshi bën disa depërtime të mira, por pa mundur të finalizojë.
Në minutën e fundit, kuqezinjtë lëshojnë nga loja e tyre. Një depërtim i francezëve nga e djathta gjen Grizman brenda zonës i cili mposht Berishën. Më pas, në minutën e fundit shtesë, një kundërsulm gjen Paje, i cili mposht Berishën.
NDIQE LIVE "PANORAMA TV" © Panorama.al
