Drejtori i Përgjithshëm i Policisë, Haki Çako, kërkon zbardhjen e ngjarjeve të vjetra pa autor në fushën e grabitjeve dhe shpërthimeve me eksploziv.
Me anë të një letërporosie të shpërndarë në të 12 drejtoritë e Policisë në qarqe, kreu i policisë kërkon zbardhjen e krimeve të vjetra të grabitjes dhe të shkatërrimit të pronës. Në urdhrin e Haki Çakos theksohet se është konstatuar se ka një nivel zbulueshmërie të ulët të këtyre veprave penale dhe për këtë arsye kërkon një informacion të detajuar nga çdo drejtori. Informacioni duhet t’i dërgohet Drejtorisë për Krimet në Drejtorinë e Përgjithshme për Sigurinë Publike.
“Drejtoria për Krimet në Drejtorinë e Përgjithshme për Sigurinë Publike kërkon informacion për veprat penale kundër pronës dhe në veçanti, vjedhjet e banesave, automjeteve, lokaleve, dyqaneve dhe vjedhjeve me dhunë, pasi është konstatuar se ka një nivel zbulueshmërie të ulët të këtyre veprave penale”, thuhet në shkresën që mban datën 10 shtator 2015.
Ndërsa theksohet se informacioni i kërkuar duhet t’i përkasë të gjitha krimeve të natyrës së sipërcituar që kanë ndodhur gjatë 8 muajve të parë të vitit, pra nga janari deri në gusht. Në analizën e Policisë së Shtetit për vitin 2014 thuhet se në të gjithë territorin kanë ndodhur 75 raste të shkatërrimit të pronës, si dhe 72 raste të shkatërrimit të pronës me eksploziv.
Edhe periudha 8-mujore, për të cilën kërkohet informacion në qendër, rezulton të ketë pasur një numër të lartë ngjarjesh të tilla dhe për këtë arsye kërkohet rihetimi e zbardhja e tyre. Ndërsa në Strategjinë 5-vjeçare të Policisë së Shtetit theksohet se nga analiza e situatës kriminale në vend ka rezultuar krimi kundër pronës përbën 30 për qind të numrin total të veprave penale.
URDHRI
“Me qëllim studimin dhe krijimin e një baze të dhënash, të cilat do të shërbejnë për organizimin e punës, nga ana juaj të dërgohet informacion i plotë për tendencat, autorët e veprave penale të vjedhjes, vendet, mjetet, metodat dhe treguesit kryesorë të punës së Seksionit për Krimet, për periudhën janar–gusht 2015”, thuhet në urdhrin e Haki Çakos, që në fakt ka qenë një propozim nga drejtori i Përgjithshëm i Sigurisë Publike, Altin Qato.
Sipas kësaj shkrese, informacioni duhet të përfshijë: Numrin e veprave penale kundër pronës, të evidentuara dhe të zbuluara në bazë komisariati policie, për periudhën janar–gusht 2015, sipas tendencave; vjedhje automjetesh; vjedhje banesash; vjedhje me dhunë; vjedhje e dyqaneve dhe lokaleve të tregtisë.
“Informacioni kërkohet i plotë sipas pikave të përcaktuara në këtë shkresë, duke pasqyruar dhe treguesit e punës për parandalimin, goditjen dhe dokumentimin e veprimtarisë kriminale të vjedhjeve të tjera, si; vjedhje të energjisë elektrike, vjedhje varësesh, çantash, aksesorë automjetesh etj.”, thuhet në urdhër.
NDIQE LIVE "PANORAMA TV" © Panorama.al
