“-A keni tyl të zi? – E do për këndim apo për prezantim?!” Ky ka qenë statusi i disatë i ish-skenaristit të Festivalit të Dhjetorit në Radiotelevizionin Shqiptar, Edi Oga, për (zh)veshjen e prezantueses Ledina Çelo.
Në fakt, Oga nuk ishte i vetmi. Fustani, nëse mund të quhet i tillë, i Ledina Çelos, u shpërnda menjëherë në rrjetet sociale sapo ajo u shfaq në ekran, për të vijuar me shpërndarjen e një fotografie që shfaqej me shpinë dhe komenteve të pafundme që pyesnin nëse ishte apo jo kjo një veshje e përshtatshme për një festival të këtyre përmasave, në Shqipëri.
Në fakt, ka të ngjarë që të mos ishte për fustanin e Ledinës, festivali të mos shihej! Pjesa më e madhe e njerëzve që u përfshinë në diskutimet që zgjatën gjatë gjithë ditës së djeshme thoshin se as që e kishin parë festivalin; shihnin vetëm fotografinë që qarkullonte në Facebook, shkruan “Panorama”.
Mirëpo, ata që pohuan këtë, me siguri që janë bërë kuriozë mbrëmë, për të parë se ç’kishte veshur Ledina në natën e dytë të Festivalit dhe çfarë do thoshte për reagimet e njerëzve nga fustani i natës së parë.
“Ledina është vajzë e shkëlqyer dhe shumë serioze në punë. Kemi punuar bashkë në Festivalin e 42-të ku ajo prezantonte si partnere e Adi Krastës. Ju lutem, mos lejoni stilistët dhe rrobaqepësit të bëjnë shakara të tilla me të, në eventin kulturor më të rëndësishëm kombëtar!”, ky ka qenë statusi tjetër i Edi Ogës që, duhet thënë, nuk ka pasur suksesin e pyetjes për tylin e zi!
Askush nuk mund ta detyrojë Ledinën të bëjë një gjë që nuk do; as stilisti e as rrobaqepësi, njësoj siç nuk e detyroi dot askush mbrëmë t’u përgjigjej pyetjeve të gazetarëve se ç’mendonte për të gjitha komentet që i ishin kundërvënë?!
“Festivalin në RTSH e kam jetuar dy herë, si skenarist, në 2003 dhe 2012. Kur je brenda, të duket gjithçka si kryevepër… kur e sheh nga jashtë, si shikues, më pak. Ledina dhe Kasemi duhet të kishin më pak emocione dhe më shumë kimi dhe tekst!” ky ka qenë statusi i parë i Ogës, përpara shpërthimit të fustanit. Pas tij, kanë vijuar sa e sa njerëz të tjerë, të medias e jashtë saj, për të lënë mendimin e tyre rreth “tylit”.
Shumë të tjerë, vetëm sa nuk janë shfaqur publikisht, sepse një mendim e kanë pasur edhe ata. Të njëjtën gjë bënë edhe të gjithë stilistët që pyetëm! Kërkuan të qëndrojnë të distancuar për të mos u përfshirë në zhurmën e komenteve që, kur nisin, e humbasin kontrollin.
Sipas profesionistëve (pyetëm më shumë se dy dhe për korrektesë, siç na kërkuan, nuk po u përmendim emrat), këngëtarja Ledina Çelo ka trupin e duhur për të veshur ç’të dojë dhe, nëse do të dalë e zhveshur, linjat ia lejojnë! Pra, përgjigjet ishin të qarta: “Nëse ka b…, le ta zhveshë!”, raporton “Panorama”.
Kjo ishte gjëja që duhej thënë me zë të lartë, por që askush nuk e tha, as Ledina vetë, duke lënë zhurmat e fustanit të sfumojnë gjithë qëllimin e Festivalit, këngën! Të revoltuarit e të inatosurit, në vend që ta hiqnin pamjen që i shqetësoi aq shumë, vazhduan ta shohin e të shkrepin foto për t’i ruajtur në celular.
Pakkush foli për aftësitë drejtuese të dy të përzgjedhurve… “Ju lutem! Mos na injoroni në këtë formë me 55-vjetore, moderatorë – pa 36 tingujt e shqipes e paradë fustanesh!!! Dikush duhet TË KTHEJË MBRAPSHT PARATË!!! Po na kthehet përcaktimi “aktor” e “regjisor” e “artist” – në OFENDIM!!! Ju lutem, se po “na merrni ftyrën”, e s’po na mbetet jetë, të merremi me profesion tjetër!”, ka shkruar aktori Genc Fuga.
Siç duket, i po të njëjtit mendim ka qenë edhe gazetarja Beti Njuma që shkruan: “Kjo zonja ka ardhur të prezantojë Festivalin, apo bythën?!”.
PANORAMA
NDIQE LIVE "PANORAMA TV" © Panorama.al
