Pas ndalimit të Dritan Shurdhit dhe shpalljes dhe arrestimit të Sebastian Shurdhit si organizatorë dhe autorë të dyshuar të sulmit me armë ndaj furgonit të RENA-s, ku u vra efektivi Basha, kanë folur për “News 24” prindërit e vëllezërve Shurdhi.
Ata thonë se djemtë e tyre nuk kanë gisht në vrasjen e ndodhur dhe se u shprehin ngushëllime familjes së viktimës.
“Shprehim ngushëllimet ndaj familjes së viktimës. Djemtë e mi nuk kanë lidhje me vrasjen e së mërkurës. Në 2007-n, policia më ekzekutoi djalin, Sabriun pa gjyq. E dënoj këtë akt, por ia kam lënë shtetit.
Nuk i jemi kthyer më kësaj ngjarje. Përflitet se djali im F. Shurdhi është autor i kësaj ngjarjeje. Këto janë shpifje. Është padrejtësi ndaj familjes time. Djali im është në burg ku vuan dënimin”, deklaroi Filip Shurdhi, babai i vëllezërve Shurdhi.
Të njëjtin version ka treguar dhe nëna e vëllezërve. “Kërkoj drejtësi për djemtë e mi, pasi nuk janë fajtorë”, tha Hamide Shurdhi. Reagimi i tyre vjen pas ndalimit të Dritan Shurdhit dhe arrestimit të Sebastian Shurdhit dy ditë më parë nga policia.
Deri tani, dyshohet se sulmi ndaj furgonit të RENEA-s të jetë bërë në shenjë hakmarrjeje ndaj vrasjes së Sabri Shurdhit, në operacionin e RENEA-s në vitin 2007. Sabri Shurdhi, në atë kohë, plagosi disa efektivë, përpara se të qëllohej për vdekje nga forcat RENEA.
Duke qenë se sulmi i të mërkurës nisi në afërsi të lapidarit të Sabri Shurdhit, policia dyshon se ai ka lidhje me vrasjen e këtij të fundit dhe se organizator është Florian Shurdhi, i cili gjendet në burg.
NDIQE LIVE "PANORAMA TV" © Panorama.al
