Deputeti i qarkut të Lezhës Eduart Ndocaj në një shkrim të gjatë në profilin e tij në Facebook, shkruan për zhvillimet e fundit në kapmet politike, sidomos sjelljen e kreut të LSI-së, njëherazi edhe kreu i Kuvendit, në raport me liderin e opozitës Lulzim Basha.
Sipas Ndocajt, largimi i Metës nga koalicioni qeverisës do t’i bënte një nder të madh PS-së.
Statusi i Ndocajt:
Prapë këta???
Shqipëria ka shansin më të mirë të largohet dhe të distancohet njëherë e përgjithmonë nga e keqja. Shqiptarët nuk duhet të pranojnë të vazhdojnë të tallen politikisht, të abuzohet nga pushteti e të shtypen nga arroganca.
Ndoqa me neveri disa fotot e filmime që të “deleguarit” e politikës shqiptare, me celularë në xhep kishin filmuar vetën teksa takonin dikë në konventën e Demokratëve në SHBA!
Madje, ndoqa me neveri teksa Meta i bënte elozhe Bashës, në prani të një demokrati amerikan. Meta po thoshte, se Basha është një lider social-demokrat.
E kuptoj vështirësinë e Metës për të bërë shpjegimin e PD shqiptare, sepse kjo është e djathtë dhe origjinalja në SHBA është e majtë. Pra, që këtu nis çoraplliku shqiptar. Një gjë që është tamam në Perëndim.
Po ashtu më vjen keq për Metën, i cili nga kryeministër në koalicion e Rilindjes, është kthyer në këshilltar i Bashës dhe një “përkthyes”. Pse vallë kjo zgjedhje e Metës? Pas 2013 PS është krenuar se Bashën e 2013 e mundi me një milion shpulla. E në këtë lum shpullash, bënin pjesë edhe ato të Metës. A i ka dhënë me të vërtetë Meta shpulla Bashës? Unë, nuk kam pasur kurrë iluzioni se marrëdhënia e Metës ka mbaruar me Bashën, atë ditë që ne bën koalicionin e qeverisjes pas zgjedhjeve të 2013! Po kur pashë sot skenën e “dashurisë” mes Bashës dhe Metës në Konventën e PD, më erdhi neveri për politikën shqiptare e më erdhi keqardhje për shqiptarët! PS, ka kaluar shumë sfida të vështira që kanë pasur të bëjnë edhe me ekzistencën e saj politike. Këto sfida janë edhe sot e mjaft të pranishme. Disa ngjarje kanë ndodhur në Shqipëri e një ndër ata është pikërisht 21 janari.
Ndoshta me miratimin e reformës në drejtësi dhe me nisjes e dashurisë së re të Bashës me Metë, është momenti që familjet e të rënëve në 21 janar të marrin përgjigjet e munguara dhe po ashtu është momenti që PS të gjejë kurajën për të bërë betejën e vërtetë për drejtësi.
Po ashtu ndoqa këtë herë edhe intervistën e radhës të Metës tek Zëri i Amerikës, i cili po na mbushte mendjen se Basha kishte të drejtë në lidhje me nenin 88! Mirë! Po kishin të drejtë Basha dhe Meta, apo do të kishin drejtësi shqiptarët! Jo, se është shumë e rëndësishme ta ndajmë këtë gjë!
Shqiptarët duhet ta kenë të qartë, se neni 88 është miratuar sipas rekomandimeve të ambasadorit Lu! E vërteta po manipulohet dhe po përdoret! Pra, nuk ka ndryshuar asgjë, po ndërkombëtarët do të kenë të drejtë vendimarrje në Këshillin e Prokurorëve dhe të Gjyqtarëve.
Po ashtu ndoqa me të qeshura tek sa Meta në intervistën e tij të dhënë tek Zëri i Amerikës thoshte: “Dua t’i siguroj të gjithë socialistët, pra atë me PS, unë jam një njëri që i qëndroj fjalëve dhe marrëveshjeve. Unë për respekt të tyre dhe të cilitdo që ka një shqetësim, jam gati që të shkojnë në grupin parlamentar të PS-së dhe t’i sqaroj për çdo përmirësim të qeverisë, por nuk duhet të përziejmë çështjen e shtetit me çështjet e koalicionit tonë”.
A thua të jetë e vërtetë që Meta i ka kaq merak socialistët? A thua se Meta nuk flenë gjumë për fatin e socialistëve. Kjo është e vështirë për tu besuar duke pasur parasysh se pikërisht nga Meta dhe LSI, socialistët janë trajtuar në disa qarqe si qytetar të dorës së dytë. Mjafton të përmendim rastin e Lezhës, LSI me 10% të votave, ka 90% të pushtetit edhe pse i humbi zgjedhjet në 2015. Ja cfarë i bëmë ne Metës! Atë që i bëri Berisha, e lamë të rritej e të forcohej në kurrizin e votave të socialistëve të thjeshtë! Po ashtu, Meta duhet të di një gjë, që nëse ai largohet përfundimisht nga koalicioni, mijëra e mijëra socialistë nisin festën kombëtare nëpër qytete si një formë shpëtimi. Pra, socialistët e presin me shumë dëshirën largimin e Metës.
Ajo që nuk kuptoj dhe këtë e them nga eksperienca ime politike është fakti, se si ka mundësi Basha, një lider i ri me një të ardhme, preferon të rinis lojën e pushtetit me Metën. Përsëri për të kuptuar këtë absurditet, mjafton të marrin përsëri në konsideratë Lezhën! Demokratët humbën zgjedhjet në 2013 dhe u lanë pa punë dhe u diskriminuan nga LSI dhe kryetar i Bashkisë. Në 2015 demokratët bën gjithë betejën për të mundur LSI dhe PS dhe ja dolën. A janë të gatshëm tani demokratët ta kenë përsëri aleat Metën dhe ta falin ish kryetarin e Bashkisë? Nga aq sa e njoh unë është thuajse e pamundur që kjo të ndodh!
Largimi i Metës nga koalicioni i bën një nder të madh PS! Një nder të madh u bën edhe socialsitëve të thjeshtë!
Ndërsa nëse Basha do e rimarr përsëri Metën, ai do të marr përsipër një gjë shumë të papranueshme dhe do të rrezikoj zhdukjen nga pushteti! Shpresoj se shqiptarët do e kuptojnë lojën që po bëhet dhe tu jap përgjigjen e merituar me 3 milion shpulla këtë herë!
