Është vetëdorëzuar në polici Albano Kusi, i cili ishte shpallur në kërkim për vrasjen e teknikut të kondicionerit në Tiranë, Indrit Çelaj.
Policia sqaron se 28-vjeçari u vetëdorëzua në Policinë e Tiranës pas negociatave me avokatin dhe familjarët, ndersa rreth një muaj me pare në polici u vetëdorëzua edhe vëllai i Albanos, Griseldo Kusi.
Viktima Indrit Celaj, vellezerit Kusi/ poshte vendi i ngjarjes
Gjykata e Tiranës ka caktuar masën e sigurisë ”Arrest ne burg”, për Albano Kusin, i akuzuar për Veprat Penale të “Veprime që pengojnë zbulimin e së vërtetës” e kryer në bashkëpunim.
Ngjarja e rëndë ndodhi më 22 gusht të këtij viti, në vilën e Kusëve, ku Indrit Çelaj u godit me një plumb në kokë, pas një sherri banal për vendosjen e një kondicioneri, ndersa humbi jeten nje dite me pas ne spital.
NGJARJA
Në momentin e vrasjes, në banesë kanë qenë 3 punonjës, të cilët janë larguar menjëherë sapo është kryer vrasja. Ndërkohë, në një lokal aty pranë, dy vëllezërit Kusi dhe babai i tyre, Bujar Kusi, janë takuar, ku nga kamerat janë kapur lëvizjet e tyre.
Griseldo Kusi është parë në këto pamje të lante duart; në njërën prej tyre kishte një njollë si ajo e gjakut. Ndërkohë, për të shpëtuar nga përgjegjësia për vrasjen, Griseldo Kusi ka shkuar në një piceri në pronësi të Ali Sulës, ku fshihej Lorenc Veliaj, të cilit i ka kërkuar të marrë përsipër fajësinë.
“Kam goditur dikë më qytë arme dhe dua që të marrësh përsipër ngjarjen”, mësohet t’i ketë thënë Kusi, 27- vjeçarit që ishte në kërkim për të tjera akuza. Por Veliaj, duke parë informacionet në media, ku thuhej se Çelaj ishte vrarë me plumb në kokë, i frikësuar nga akuza e vrasjes, ka vendosur të vetëdorëzohej dhe të shpjegojë situatën.
“Po ndihesha i mashtruar dhe po më kërkonte të merrja përsipër një krim që unë nuk isha i gatshëm ta bëja. Dola nga piceria dhe ika që të vetëdorëzohesha në Komisariatin nr. 4, që më kishte shpallur në kërkim më herët”, ka dëshmuar Veliaj.
Kush janë dy vëllezërit Kusi:
Dy vëllezërit Griseldo dhe Albano Kusi nuk janë të panjohur për drejtësinë, pasi më herët janë hetuar, gjykuar dhe shpallur fajtorë për vrasje dhe kanosje. Albano Kusi, në moshën 19-vjeçare ka vrarë kushëririn e tij, Shkëlqim Nozllin, dhe trupin e tij e la në Sauk. Ndërkohë, në po të njëjtin vit, edhe Griseldo Kusi është dënuar me 8 muaj burg, që i është konvertuar në shërbim prove, pasi ka goditur me qytë arme dhe ka kanosur një shtetas për t’i marrë lekët që ai i kishte borxh të atit të tij, Bujar Kusi.
Njoftimi i plote i policise:
Në vijim të veprimeve për zbardhjen e ngjarjes së ndodhur në rrugën “Muhamed Gjollesha”, si rezultat i kontrolleve të pandërprera të ushtruara në ambientet të ndryshme e banesa, dhe përdorimit të metodave proaktive, si dhe pas negociatave me avokatin dhe familjarët, është bërë e mundur që në ambientet e Drejtorisë Vendore të Policisë Tiranë të vetë dorëzohet shtetasi në kërkim Albano Kusi
Specialistët e Sektorit për Hetimin e Krimeve ndaj Jetës dhe Pronës, bënë ekzekutimin e urdhërit të ndalimit të lëshuar nga Prokurori si dhe të vendimit të Gjykatës së Gjykatës së Shkallës së Parë Tiranë e cila ka vendosur masën e sigurisë Arrest në Burg, për shtetasin :
Albano Kusi, 28 vjeç, lindur në Tiranë dhe banues në Tiranë,
Prokuroria pranë Gjykatës së Shkallës së Parë Tiranë, në datë 25.08.2019, ka dërguar urdhërin e për ekzekutimin e vendimit penal të datës 25.08.2019, të Gjykatës së Shkallës së Parë Tiranë, e cila ka caktuar masën e sigurisë ”Arrest ne burg”, për shtetasin Albano Kusi për Veprat Penale të “Veprime që pengojnë zbulimin e së vërtetës” e kryer në bashkëpunim.
Shtetasi Albano Kusi, në datë 22.08.2019, rreth orës 11.00, në rrugën Muhamet Gjollesha, Tiranë, në ambientet e katit të parë të godinës tre katëshe në pronësi të shtetasit Bujar Kusi, ka kryer veprime që pengojnë zbulimin e së vërtetës, në lidhje me vrasjen me armë zjarri të shtetasit I. Ç.
Materialet në ngarkim të shtetasit Albano Kusi, i dërgohen Prokurorisë së Rrethit Gjyqësore Tiranë për veprat penale të “Veprime që pengojnë zbulimin e së vërtetës” e kryer në bashkëpunim.
Vijon…
NDIQE LIVE "PANORAMA TV" © Panorama.al
