Me 104 vota pro, 7 kundër dhe 3 abstenim, mazhoranca ka votuar shkarkimin e Ilir Metës nga funksioni i Presidentit të Republikës.
Vendimi u bë me dije nga kryetari i Komisionit Hetimor Alket Hyseni, i cili u shpreh: “Në përfundim të votimit, numërimi rezulton se: në bazë të firmave të vendosura në listat përkatëse kanë marrë pjesë në votim 114 deputetë, nga fletët e përdorura fletë votimi të vlefshme 114, të pavlefshme asnjë, pro 104 vota. kundër 7 dhe 3 abstenim. Zoti Ilir Meta president i Republikës shkarkohet nga detyra”.
Shtatë deputetë nuk ishin të pranishëm në sallë: Ambra Borova, Rudina Hajdari, Enada Kapllani, Korab Lita, Jetmira Raboshta, Olta Xhaçka dhe Fidel Ylli.
Për herë të parë në 30 vite pluralizëm Parlamenti shprehet me votë për shkarkimin e një presidenti në Shqipëri. Tashmë çështja pritet t’i kalojë Gjykatës Kushtetuese, e cila duhet të vihet në dijeni për votimin brenda 5 ditëve nga ana e Kuvendit. Kushtetuesja do të japë edhe verdiktin final lidhur me vendimin në fjalë.
Më herët Kuvendi miratoi me 104 vota pro raportin e Komisionit Hetimor për shkarkimin e presidentit Ilir Meta.
AKUZAT
Në përfundim të hetimit që zgjati afërsisht një muaj, Komisioni i Posaçëm Parlamentar që u drejtua nga Alket Hyseni që nuk do të jetë më në Parlamentin e ardhshëm doli në përfundimin se kreu i shtetit “Ka cenuar rëndë parimin e ushtrimit të sovranitetit nga ana e popullit (në kundërshtim me nenin 2, pika 1 të Kushtetutës); Ka shkelur Kushtetutën e ka marrë njëkohësisht tagra të sovranit dhe Kuvendit; Është sjellë arbitrarisht me pushtetin, përkundër natyrës së Republikës Parlamentare (në kundërshtim me nenin 1, pika 1, të Kushtetutës); Ka anuluar arbitrarisht datën e zgjedhjeve (në kundërshtim me nenin 92, germa “gj”, të Kushtetutës dhe nenin 8, 9 dhe 10 të Kodit Zgjedhor); Ka cenuar parimin e periodicitetit të zgjedhjeve (në kundërshtim me nenin 1, pika 3 dhe nenin 109 të Kushtetutës);
Ka cenuar parimin e ushtrimit të pushtetit në shtet nga një qeverisje e dalë nga zgjedhje të lira (në kundërshtim me nenin 1, pika 3, të Kushtetutës); Ka cenuar parimin e kushtetutshmërisë dhe ligjshmërisë (në kundërshtim me nenin 4 paragrafi i dytë i Kushtetutës dhe nenin 4 të Kodit të Procedurave Administrative); Ka nxjerrë një akt në kundër- shtim të hapur dhe flagrant me ligjet; Ka cenuar parimin e të drejtës së qytetarëve si sovranë për të zgjedhur dhe për tu zgjedhur (në kundërshtim me nenin 45, pika 1, të Kushtetutës)”, thuhet në raportin e Komisionit Hetimor. Ndërkohë, vendimin përfundimtar për shkarkimin e Presidentit nëse sot Parlamenti voton pro largimit të tij, e jep Gjykata Kushtetuese, e cila aktualisht është funksionale me 7 anëtarë nga 9 që ka normalisht.
NDIQE LIVE "PANORAMA TV" © Panorama.al