Një 48-vjeçar është arrestuar nga policia e Tiranës, pasi shtetasi B.K, dhunonte në sy të fëmijëve të mitur gruan e tij. Po ashtu Policia ka arrestuar edhe katër persona të tjerë për vepra të ndryshme penale.
Po ashtu mes të arrestuarve janë një 23-vjeçar, i cili vazhdimisht përndiqte ish-të dashurën e tij, një 22-vjeçar, i cili është kapur sëbashku me një person tjetër duke prerë kabllo elektrikë në zonën e Bulevardit të Ri.
Ndërsa një tjetër shtetas është arrestuar duke drejtuar mjetin në gjendje të dehur dhe një 18- vjeçar, i cili i kërkonte një vajze 150 mijë lekë të vjetra në mënyrë që të mos i publikonte fotot intime në rrjetet sociale.
Njoftimi i policisë:
Arrestohen në flagrancë 5 shtetas, për vepra të ndryshme penale.
Specialistët për Hetimin e Krimit në Komisariatin e Policisë Nr. 2 bënë arrestimin në flagrancë të shtetasit B. K., 48 vjeç, pasi në rrugën “Dritan Hoxha”, në banesë, ka ushtruar dhunë fizike dhe psikologjike ndaj bashkëshortes së tij, në prani të fëmijëve të mitur.
Po nga specialistët për Hetimin e Krimit në Komisariatin e Policisë Nr. 2 u bë arrestimi në flagrancë i shtetasit R. P., 23 vjeç, sepse ka përndjekur vazhdimisht ish-të dashurën e tij, duke i krijuar asaj gjendje frike dhe pasigurie për jetën.
Specialistët për Hetimin e Krimit në Komisariatin e Policisë Nr. 3 arrestuan në flagrancë, për veprën penale “Vjedhja” e kryer në bashkëpunim, shtetasin A. M., 22 vjeç, pasi në Bulevardin e Ri, në bashkëpunim me një shtetas ende të paidentifikuar (punohet për identifikimin dhe kapjen e tij) është kapur në flagrancë duke prerë me mjete prerëse një pjesë kablloje elektrike nëntokësore të ndriçimit të bulevardit.
Nga specialistët e Qarkullimit Rrugor u bë arrestimi në flagrancë i shtetasit R. G., 36 vjeç, pasi në rrugën “Ali Demi”, pasi u kap duke drejtuar mjetin në gjendje të dehur.
Nga Sektori për Hetimin e Krimeve të Rënda ndaj Jetës dhe Pronës u bë arrestimi në flagrancë i shtetasit me iniciale A. K., 18 vjeç, si dhe u referuan materialet në Prokurorinë pranë Gjykatës së Shkallës Parë Tiranë, për shtetasin në kërkim me iniciale D. K, 30 vjeç, pasi në bashkëpunim kanë shtrënguar me anë të kanosjes dhe dhunës për dhënie pasurie, një shtetase, me qëllim t’i përvetësonin shumën prej 15.000 lekësh të reja, për mospublikimin e fotove të saja në rrjetet sociale.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
NDIQE LIVE "PANORAMA TV" © Panorama.al
