Profesor Gjergj Klimi, matematikani që bëri emër në Shqipëri dhe SHBA
Pak i njohur, po shumë i rëndësishëm në fushën e gjetjeve mbi balestikën e predhave që përdoren në ushtri”. Kështu e vlerësonte profesor Gjergj Klimin një studiues i Pentagonit, teksa shprehte konsideratat e tij për librin më të fundit “Elements of Exterior and terminal Ballistics”.
I gjashti në kolanën e botimeve të këtij lloji me autorësinë e tij, libri i profesorit shqiptar që ushtronte pedagogun në universitetet e Nju Jorkut, tërhiqte vëmendjen, ndër të tjera, për mënyrën interesnate të shfrytëzimit të ligjit të Njutonit dhe atij të Snellit në çështjet e balestikës, por jo vetëm.
Po kush është profesor Klimi që ka bërë emër në qarqet shkencore të Amerikës për botimet në këtë fushë pak të studiuar e hulumtuar dhe çfarë veprimtaria shkencore ka kryer në vite, si një kërkues e petagog modest, i thjeshtë e i përkushtuar. Çfarë përfaqëson puna e tij shkencore dhe për se e vlerësojnë specialistët e fushës.
JETËSHKRIMI
Ka qënë viti 1972 kur profesori i njohur Gjergj Klimi, i ri në moshë atëherë, kapërceu postobllokun e Akademisë Ushtarake, garnizonit më të madh në qytetin e Tiranës, për të ushtruar profesionin e pedagogut të matematikës e fizikës. I futur rishtas në mjediset e zymta të auditoreve të blerta, ku gjithçka frymonte me tone të vrazhda për luftë e mbrojte, për sulme e kundërsulme mbi armiqtë që nuk u shfaqën kurrë, i dukej vetja se gjëndej aty gabimërisht. Brishtësia e moshës dhe qytetaria e trashëguar nga familja, përpos profilit liberal, aq shumë të spikatur në vitet e studimeve, e bënin Gjergj Klimin të ndjehej disi i huaj në përditshërinë alla bolshevike të qytezës që zgjohej e binte në gjumë me sinjalet e borisë që të rrënqethte mishin. E megjithëatë, dashuria për profesionin dhe aftësia për të depërtuar në zemrat e kadetëve me uniformë me çiltërisi dhe kulturë, i dhanë dorë për ta kryer me sukses detyrën, madje të spikaste ndër kolegë si mësimdhënës, por edhe si studiues i shkencave ushtarake. Plotë 20 vite shërbeu aty. Me përkushtim e pasion, deri në kapërcyllin e viteve 80, atëherë kur po kapërcente dhe regjimi. Ai kapërcyll e gjeti shkencëtarin Klimi në krahun e duhur të historisë. Përballja e tij me falangrat e ish sigurimit të shtetit, që tentuan ta ringrinin momumentin e diktatorit Hoxha në oborrin e Akademisë që deri në atë periudhë mbante emrin e këtij të fundit, ishte nga veprimet më të bujshme të atyre ditëve në Tiranë. Pas këtyre momenteve dramatike profesori Klimi do të vijonte karrierën shkencore fillimisht në auditoret shqiptare e më vonë në SHBA.
FAMILJA
Gjergj Klimi, biri i Vlashit dhe Violetës lindi në Tiranë në vitin 1947. Pas përfundimit të shkollës shtatë vjeçare te “10 Korriku”, kreu gjimnazin “Sami Frashëri” në Tiranë, për të vijuar studimet universitare në Fakultetin e Shkencave, në degën Matematikë-Fizikë. Familja e tij me origjinë nga Voskopoja, u vendos në Tiranë, fal këmnguljes së gjyshit, që la vendlindjen dhe bleu një shtëpi prej qerpiçi, me disa toka përreth në qendër të qytetit (aty ku ka qenë MAPO e madhe, më vonë disko Albania), në rrugën e Dibrës, të cilën e bëri dy katshe me shumë dhoma e anekse. Nëna e tij, Violeta nga Pogradeci, vinte në Tiranë nga një familje e pasur dhe me tradita të hershme. Familja e saj kishte një shtëpi dy katëshe me bahçe me një vreshtë me rrush e pemishte frutash dhe kishin ndërtuar një hotel dykatësh me restorant në katin e parë e dhoma gjumi në katin e dytë, pranë tij kishte edhe një paisje furnizimi me karburant. Gjendej në rrugën kryesore, përballë liqenit të Ohrit. Violeta kishte edhe dy vëllezër, Kristaqin e Mihallaqin dhe dy motra Gliqirien e Adelinën. Bashkëshortja e Klimit, Dorina Paço, me të cilën ka dy djem, Iveni dhe Hiperioni, është e bija e skulptorit të shquar Janaq Paço. Ajo ka përfunduar studimet për frëngjisht dhe ka punuar shumë vite në Shtëpinë Botuese Naim Frashëri, Tiranë.
KARRIERA
Profesor Gjergj Klimi e ka nisur profesionin si mësues matematike e fizike në vitin 1970 fillimisht në shkollën e Arbanës në Tiranë e pastaj në gjimnazin e Laçit. Nga viti 1972 dhe deti në vitin 1992 ka ushtruar profesionin e petagogut në Akademinë ushtarake nga petagog I thjeshtë te përgjegjës I departamentit të Fizikës. Karrierën profesionale si mësimdhënës e ushtroi më vonë në Kolegjin e Teknologjisë NYC dhe në Universitetin Pace (Nju Jork).Në vitet ’90, ka punuar në Komitetin e Shkencës dhe Teknologjisë dhe në Ministrinë e Arsimit të Lartë dhe Kërkimit shkencor në Shqipëri si Drejtor I Zyrës Tempus, përgjegjës për zbatimin e Programeve të Komunitetit Evropian për ristrukturimin e arsimit të lartë. Është vlerësuar me Medaljen e Artë të Shqiponjës, nga Presidenti I Republikës së Shqipërisë, për kontributin e dhënë në lëvizjendemokratike kundër diktaturës dhe për ristrukturimin e arsimit të lartë në Shqipëri.
NDIQE LIVE "PANORAMA TV" © Panorama.al