DORINA AZO/ Qeveria në partneritet me sektorin privat dhe donatorët do të nisë kurse falas për kualifikimin e të papunëve të regjistruar në zyrat e papunësisë, si dhe të familjeve me ndihmë ekonomike.
Kursi do të ndiqet për një vit dhe do të jetë i detyrueshëm për këto kategori. Ministri i Financave dhe Ekonomisë, Arben Ahmetaj, tha dje se brenda 1 viti, në kurset profesionale do të kualifikohen 76 mijë të papunë. Ministri Ahmetaj, deklaratën e bëri në aktivitetin për hapjen e aplikimeve për thirrjen e tretë të programit të vetëpunësimit, ku çdo i ri me një ide dhe plan biznesi mund të aplikojë deri në 30 shtator pranë Zyrës së Punësimit Tiranë dhe do të përfitojë financim të biznesit.
“Ministria e Financave dhe Ekonomisë, Shërbimi Kombëtar i Punës, së bashku me donatorët, do të nisë një fushatë jo njëditore, jo njëmujore, jo tremujore, por njëvjeçare të rikualifikimit të të gjithë të papunëve që janë në moshë pune, me detyrim, me pagesë nga buxhetit i shtetit. Pra, rikualifikimi i të gjithë forcës që është e punësueshme, është në moshë pune, pra, brenda të papunëve të regjistruar apo anëtarëve të familjeve që marrin ndihmë ekonomike, por që janë në forcë pune e në gjendje pune, një rikualifikim i aftësive të tyre teknike brenda një viti. Objektivi ynë, me një instrument administrativ, politik dhe financiar që do të drejtohet nga Shërbimi Kombëtar i Punës, kuptohet në drejtimin e Ministrisë së Financave dhe Ekonomisë, është që në fund të vitit 2019 të dalim dhe të themi: Po, ne kemi rikualifikuar prej vërteti 76 mijë të papunë të regjistruar në 10 apo 12 kurse teknike apo të kombinuara me atë që i referohemi ‘soft skills’, me të drejtë, dhe në fund të kurseve që do të jenë falas dhe të detyrueshme, të gjithë ata të papunë të regjistruar, do të kenë jo thjesht një certifikatë, një letër në dorë, por do të kenë dalë nga ato kurse kualifikimi me aftësi të vërteta teknike e jo vetëm dhe do të jenë shumë herë më të punësueshëm. Kuptohet që këtu, siç e theksova, partnerët tanë do të jenë sektori privat dhe patjetër donatorët”, tha Ahmetaj.
Ministri Ahmetaj tha se papunësia në vend është ulur në 12,4 për qind dhe brenda mandatit të dytë punësia do të shkojë njëshifrore.
“Ju besoj e ndoqët edhe Institutin e Statistikës së fundmi, ku doli me shifrën e papunësisë dhe nga 18.2 % që ka qenë në vitin 2014, ka zbritur në 12.4 %. Prapë e theksoj, nuk e sjell shifrën për t’u krenuar. Nuk ka asgjë për t’u krenuar, ndërkohë që ka akoma edhe 160 a 180 mijë qytetarë shqiptarë për t’ punësuar. Por, trendi është shumë i rëndësishëm, është rënës dhe ne kemi sfidën që në fund të këtij mandati papunësia të shkojë në njëshifrore”, u shpreh ministri.
PANORAMA
NDIQE LIVE "PANORAMA TV" © Panorama.al
