UPDATE/ Deputeti i PS-së, Koço Kokëdhima ka sfiduar dje Këshillin e Mandateve dhe Imuniteteve duke mos marrë pjesë në mbledhjen ku do të shqyrtohej vlefshmëria e mandatit të tij, por në të njëjtin orar ai ka zhvilluar një takim në spitalin “Nënë Tereza”, ku ka vizituar një 21- vjeçar, i arrestuar për konsumim hashashi.
Kokëdhima është përfaqësuar në Kuvend nga avokati i tij, ndërkohë që kërkesën e deputetëve të PD-së e ka quajtur si humbje kohe.
“Unë kam axhendën time të punës dhe nuk preferova që ta harxhoja këtë kohë për të bërë debate politike me boritë e Saliut, por e kam përdorur për nevojat e qytetarëve. Siç kam bërë edhe herë të tjera, kur nuk e kam harxhuar kohën e publikut me shpifjet e Saliut. Diskutimi është teknikoligjor, dhe për këtë përballë borive politike të shpifëse të Saliut janë ekspertët ligjorë”, u shpreh Kokëdhima.
Deklaratën deputeti socialist e ka bërë nga ambientet e Spitalit “Nënë Tereza” në Tiranë, ku vizitoi një përdorues të hashashit, i cili është dënuar me burgim.
“Një i ri që quhet Mihal Llazari është vetëm 21 vjeç, ka më shumë se 1 vit e gjysmë në burg, ka pësuar një tronditje të thellë psikike, prej 3 javësh nuk komunikonte, por sot shkroi një letër për drejtorin e Përgjithshëm të Burgjeve. Është nga Himara, nuk ka bërë asnjë krim, thjesht ka qenë përdorues i hashashit, pasi ka pasur familje me prindër të ndarë”, tha Kokëdhima.
Deputeti i PS-së tha se ka dhe shumë të rinj të tjerë të dënuar për këtë shkak, ndaj dhe duhet rishikuar legjislacioni.
NDIQE LIVE "PANORAMA TV" © Panorama.al
