Kumbaro ndryshon ligjin e Kulturës, aktori Fuga kundër: Jam socialist, por s’mund të rri…

SHPËRNDAJE

Aktori i njohur, Genc Fuga, njëherësh pedagog dhe regjisor, ka reaguar me nje shkrim shigjetues ndaj ministres se Kulturës, Kumbaro, per te cilën thote se “nuk harron asnjëherë të surprizojë gjithë komunitetin artistik. Kjo është një veçori e punës së saj, edhe në këtë mandat të dytë”.

genc-fuga

GENC FUGA

Ministrja e Kulturës, Zonja Kumbaro, nuk harron asnjëherë të surprizojë gjithë komunitetin artistik. Kjo është një veçori e punës së saj, edhe në këtë mandat të dytë.

Që në muajin e parë të vitit 2018, i është dashur që të dalë në intervista të ndryshme dhe të na çudisë. Duke shfletuar faqen e internetit të kësaj ministrie, shohim në kolonën e Baza Ligjore – Projektligje, të publikohet, projektligji PER DISA SHTESA DHE NDRYSHIME NE LIGJIN NR. 10352, Datë 18. 11. 2010. “PER ARTIN E KULTUREN”, TE NDRYSHUAR.

Ditët e para të vitit 2018 duhet të ishin ditët e “dëgjesave” të platformave të reja të drejtimit të disa institucioneve qëndrore artistike, nën varësinë e Ministrisë së Kulturës. Por, kjo nuk ndodhi!

Sigurisht, të mbetur pa mandate, disa drejtues, janë pajisur me Urdhrin përkatës, që i përcakton si “të komanduar”. Por, një drejtor i komanduar, nuk mund të kryejë veprime me “të tretët”! Në natyrën e këtyre institucioneve, është një marrëdhënie e ngushtë, pikërisht me “të tretët”.

Gjithçka kalon në heshtje, derisa opinioni kujtohet e fillon të rendisë hamendësitë e tij:

1- Përse nuk u morën masa për organizimin e konkurseve për drejtimin e ri të institucioneve qendrore kulturore? Nuk dihet. Ndoshta ju ka dalë nga mendja.

2- Në rast se nuk donte t’i lëvizë, por donte mënyrën si punonin ata, përse i lë pa mandate? Se mund të organizohej konkursi dhe të kishim emrat e drejtuesve aktualë, fitues si platforma më e mirë 4–vjeçare (kjo gjë është e mbrojtur me Ligj).

3- Përse i duhen drejtuesit “të komanduar”? Këtu imagjinata merr krahë, dhe, ju siguroj, për keq (për keq, d.m.th, në dëm të institucioneve publike e interes të komunitetit artistik)

Nga ana tjetër, duke parë këto pikëpyetje që venë e vinë, dhe që pikëpyetjet pa përgjigje kanë veti të shumohen deri në pyetje retorike, ministrja Kumbaro, bën 2 veprime të radhës:

1- Deklaron që Teatri Kombëtar “lëviz” te “Turbina”, dhe godina aktuale e TK-së vihet në dispozicion të Teatrit të Operas!!!

2- Shfaq “pa bërë zë” një projektligj në internet!!! Mendjet e njerëzve (duke përfshirë edhe timen), të çoroditura nga pyetjet retorike të thëna më lartë, tashmë kanë marrë edhe këto dy goditje “nën brez”, dhe, ashtu të çoroditur, ulen në tastierë e shkruajnë.

Fillon shikon se si “institucionet qendrore kulturore bashkohen dhe trajtohen njësoj me ato lokale”.

Vazhdon me shfuqizimin e germës “dh”! Uppps, iku Cirku! Ku shkoi? Mbase i shkon Bashkisë. Por, po i vajti Bashkisë, kalon në precedent për të gjithë bashkitë. Pra, i lind e drejta Tepelenës që të ketë Cirkun e vet (fjala që bie). Kësaj i thonë mirë e hodhe, por ku e çove?

Galeria Kombëtare, shndërrohet në Muze Kombëtar të Arteve të Bukura. Po kjo pikë e zezë, ç’ishte? Po galeria ku vajti? Si do t’i bëhet me nevojën kombëtare të të pasurit Galeri?

Vazhdon me marrjen nën kompetencë të QKK-së, Bibliotekës Kombëtare, Arkivin Qendror e krijimin e dy qendrave të reja. Sikur u gëzuam shumë që këto institucione i kishim shumë pranë Qeverisë, me një status independence “larg politikës”… Ku gabuam?

Në Nenin 5, vjen një nga ato goditjet, që ty të vjen mendja rrotull jo më për 4 vjet (një mandat), POR pa mandat fare. Çështje dëshire të ministres! Uppps!

Domethënë, që në nenin 5, ti e ke humbur kthjelltësinë e mendimit, dhe je i bindur që gjuha e përdorur nuk është më shqiptare! Përherë e më tepër të del në pah “me Urdhër të Titullarit”, çka në esencë “të vet”, e shndërron nga projektligj në projektrregullore e brendshme e një megastrukture kulturore, të pakulturë, arrogante, fyese dhe zhdukëse të çdo lloj tendence “ndryshe”! Kujdes, bëhet fjalë për çdo skenë në Republikën e Shqipërisë.

Mos kujtoni se gjen qetësi në Nenin 9, pika 4, që thotë se për çdo mendje shkrepje artistike e kulturore të institucioneve, që nuk kanë objekt artin apo kulturën, duhet të marrë miratimin me shkrim të ministres!

Kujdes nga Neni 12, se sapo u zhduk e drejta për të menduar e vepruar, çdo bashkie në fushën e art-kulturës. Kujdes 1000 herë nga Neni 15, i cili heq “kriteret e vendosur me VKM të shpërblimit të figurës artistike dhe e lë gjithçka në dorë të negociatës, dhe ‘punës veresie’”. Rreshti më i rrezikshëm është: Ky ligj hyn në fuqi 15 ditë mbas botimit në Fletoren Zyrtare!

Ore, çfarë po bëhet? Më falni, por janë shumë gjëra që ndodhin brenda Eklipsit të Hënës. E përmenda Hënën, se ajo, dihet, ka shumë ndikim në jetën tonë! E keni dëgjuar shprehjen: Nuk është me hënë të mirë?!

Unë nuk dua të marr leje me shkrim edhe për provimet e studentëve të mi, aq me pak, te Ministrja e Kulturës.

Unë jam kryefamiljar, pedagog, aktor, regjisor, socialist, etj., etj. dhe kam bindjen time: “Nuk i zgjidhim problemet, duke mos folur për to”.

M’u kujtua një status në fb – personal: “Ju ja rrasni me varre, mbrapa koke, puntorit, qysh me mjes, e pastaj e pysni: Shok puntor, pse t’merren ment????”

E me sa mend unë vazhdoj e shkruaj??? Tani është vonë! Tani kam filluar t’ju them njerëzve në rrugë: më fal se të fika cigaren me ballë, se vetëm xixa shoh!!!

(Titulli i autorit: SHOK PUNETOR, PSE T’MERREN MENT?!)

Te lidhura

 

Artikulli paraprak“Kryeministri i falimentuar i Rilindjes ka vetëm një gjë në tru: ‘Shtetin e mikut”
Artikulli tjetërArta Marku mesazh të fortë nga Elbasani: Zonë 'e nxehtë' e kriminalitetit, po investojnë edhe në...

4 KOMENTET

  1. Si rregull per komunistet;”Partia mbi te gjitha”,prandaj mos un shtir ti shoku socialist.

  2. O i vetmi Fuge qe s`ju hap telashe njerzve! Po ça kujtove ti se socialistet ishin me te mire se ne ë?? Njelloj te keqen, njelloj. Gjithsesi artikullin e ke qendisur dhe me pe te holle madje.
    P.s. Shiko se mendje hollet i perjashtojne nga partia. Jo per gje po hapin telashe.

  3. Filloje ti i pari reflektimin shoku Fuga duke u kerkuar falje shqiptareve qe me voten dhe propaganden tende mundesove ardhjen ne pushtet te ketyre mostrave.

  4. Ju pergezoje per shkrimin z. Fuga. Nuk i perkas fushes se artit, por me te tuajen ju keni ngritur shqetesimin/trullosjen time si prind qe ndjek femijen ne shkolle. E njejtja sjellje/qasje ndaj zgjidhjeve te ngerceve si ne art. Bie dakort me ju, qe nuk ka asgje te keqe per te folur dhe per te ngritur shqetesime aty ku ka. Quo vadis?!?!

PËRGJIGJU