Rreth dhjetë ditë pas ngjarjes tragjike në fshatin Grecalli të Fierit, ku një 38- vjeçar qëlloi për vdekje me kazmë një fëmijë 8 vjeç, banesa e autorit të krimit të rëndë është përfshirë nga flakët.
Shtëpia ku jetonte 38- vjeçari është shkrumbuar bashkë me orenditë e pakta që kishte brenda. Ende nuk dihet nëse zjarri është vënë qëllimisht dhe nëse akti ka qenë i tillë, nuk dihet nëse është ndërmarrë nga familjarët e të ndjerit në shenjë hakmarrjeje apo është vendosur për të fshehur gjurmët e mundshme në vendin e ngjarjes.
“Në fshatin Grecalli, Fier, ka marrë flakë dhe është djegur pjesërisht banesa e shtetasit Klodian Çalamani, 39 vjeç. Grupi hetimor po punon për përcaktimin e shkaqeve të rënies së zjarrit”, sqaroi shkurtimisht Policia.
NGJARJA
Mateo Vasia është vrarë në mënyrë makabre nga fqinji i tij paraditen e 16 nëntorit. Pas denoncimit të nënës, Florindës, forcat e rendit janë vënë menjëherë në lëvizje, duke nisur hetimet për rastin.
Kamerat e sigurisë në zonë, të cilat janë këqyrur nga hetuesit, kanë zbuluar momentet e fundit të 8-vjeçarit, i cili kishte biseduar për disa momente dhe kishte pedaluar në rrugët e lagjes me biçikletën e atij që do të bëhej vrasësi i tij.
Pas këtij momenti, Policia ka ushtruar kontrolle në banesën e 38-vjeçarit Klodian Çalamani, i cili jetonte i vetëm në banesë pas divorcit të prindërve. Trupi i pajetë i vogëlushit është gjetur i groposur në kopshtin e shtëpisë së autorit të dyshuar të krimit, i mbuluar me baltë.
“Me marrjen e njoftimit, shërbimet e Komisariatit të Policisë Fier kanë bërë shpalljen në kërkim dhe në mënyrë të menjëhershme nga veprimet në terren, duke vlerësuar maksimalisht situatën dhe rëndësinë e saj, kanë marrë informacion, kanë punuar në grumbullim dhe administrim të provave dhe kanë bërë të mundur gjetjen e vendit të dyshuar ku mund të ndodhej fëmija i humbur. Mbi bazën e vlerësimit të provave, në banesën e shtetasit K. Ç., 38 vjeç, pas kontrollit, është bërë e mundur gjetja e trupit të fëmijës së dyshuar i humbur, i mbuluar me baltë”, sqaroi Policia.
Policia tha gjithashtu se djali 8-vjeçar është goditur me një mjet bujqësor në pjesën e kokës, çka ka qenë fatale për të.
“Shtetasi Klodian Çalamani dyshohet se e ka goditur me send të fortë (kazmë) në kokë fëmijën e mitur dhe më pas e ka groposur atë në oborrin e banesës së tij. Nga këqyrja e vendit të ngjarjes u gjetën dhe u sekuestruan në cilësinë e provës materiale: një lopatë, një kazmë, një biçikletë, rroba të autorit dhe njolla gjaku, të cilat u dërguan për ekzaminime të mëtejshme në Institutin e Policisë Shkencore Tiranë”, thuhet më tej.
