Kreu i PD, Lulzim Basha kujton vrasjet e 2 prillit 1991 në Shkodër: Emrat e 4 martirëve kumbojnë fort në ndërgjegjen tonë! Në rrugën e duhur drejt fitores

Apr 2, 2021 | 8:46
SHPËRNDAJE

Kryetari i Partisë Demokratike, Lulzim Basha ka kujtuar sot 30-vjetorin e vrasjes së 4 personave në Shkodër, të Arben Brocit, Nazmi Kryeziut, Bujar Bishanakut dhe Besnik Cekës.

basha-vrasja-2-prill-shkoder

Në një status në Facebook, kryedemokrati Basha shkruan se emrat e 4 martirëve kumbojnë në ndërgjegjen e shqiptarëve. Ndërsa shprehet se i japin siguri se është në rrugen e fitores.

Basha thotë se ata u vranë nga regjimi i Partisë së Punës sepse guxuan t’ia thonë në sy se koha e tyre kishte përfunduar dhe shqiptarët kishin zgjedhur lirinë dhe Europën.

“30 vite më pas, 2 prilli, emrat e 4 martirëve të asaj dite të zymtë kumbojnë fort në ndërgjegjen tonë dhe na japin sigurinë se jemi në rrugën e drejtë dhe në rrugën e fitores mbi të keqen, të ndryshimit që po vjen për çdo shqiptar, në rrugën e Shqipërisë si gjithë Europa. Lavdi përjetë martirëve të 2 prillit!”, shkruan Basha në postimin e tij.

Postimi i plotë i Lulzim Bashës

Si sot 30 vjet më parë, më 2 prill 1991, regjimi gjakatar i Partisë së Punës vrau pa mëshirë dhe qëllimisht 4 djem të rinj, bij të Shkodrës dhe pishtarë të demokracisë.

Arben Broci, Nazmi Kryeziu, Bujar Bishanaku dhe Besnik Ceka u qëlluan nga falangat e regjimit që po jepte shpirt, sepse guxuan t’ia thonë në sy dhe publikisht diktaturës në panik se koha e saj kishte përfunduar dhe shqiptarët kishin zgjedhur lirinë dhe Europën.

Ai lumë njerëzish të lirë që vërshoi në rrugët dhe sheshet e Shkodrës dëshmoi se edhe në momentet më të vështira dhe përballë tiranisë më të pashpirt, shqiptarët janë të gatshëm të përqafojnë lirinë me çdo çmim.

Heronjtë e 2 prillit janë heronjtë e gjithë Shqipërisë. Dëshira, guximi dhe përpjekja për ta bërë Shqipërinë një vend të lirë, ngritën themelet e ndërtimit të një shteti demokratik. Përpjekje nga e cila ne nuk kemi hequr dorë asnjëherë dhe për të cilën punojmë çdo ditë.

Kjo ditë i jep një kuptim të veçantë dhe lëvizjes që ne kemi nisur sot.

30 vite më pas, 2 prilli, emrat e 4 martirëve të asaj dite të zymtë kumbojnë fort në ndërgjegjen tonë dhe na japin sigurinë se jemi në rrugën e drejtë dhe në rrugën e fitores mbi të keqen, të ndryshimit që po vjen për çdo shqiptar, në rrugën e Shqipërisë si gjithë Europa. Lavdi përjetë martirëve të 2 prillit!

NDIQE LIVE "PANORAMA TV" © Panorama.al

Te lidhura