UPDATE/ Kosova feston sot tetë vjetorin e pavarësisë. Forca të Policisë së Kosovës dhe të FSK-së u pozicionuan në sheshet e Prishtinës. Dy institucionet e sigurisë janë përgatitur për parakalimin në sheshet kryesore të kryeqytetit ku edhe janë vendosur rrethojat në tërë sheshin për të mundësuar parakalimin.
Presidentja e vendit, Atifete Jahjaga në ceremoninë e organizuar tha se kjo është dita më e shënuar e historisë së Kosovës, që e përmbledh sakrificën e gjeneratave të tëra për një shtet. Ajo tha se kjo është dita e qytetarëve të Kosovës, e amanetit të gjeneratave të tëra që kanë sakrifikuar.
Jahjaga tha se Kosova sot, është një demokraci ende e papërfunduar dhe e sfiduar.
“Sot është një ditë feste, e të gjithë atyre që e shohin atdhe të tyre”, tha Jahjaga.
Presidentja e vendit, foli edhe për FSK-në, duke e quajtur e ardhmja e Kosovës.
Kryeministri i vendit, Isa Mustafa u shpreh se në këto 17 vite liri dhe 8 pavarësi ka bërë reforma rrënjësore dhe nuk mund t’i rrënojë askush. Ai i ftoi qytetarët e Kosovës ta shënojnë këtë ditë me mburrje për të arriturat në vend.
“Urime dita e pavarësisë, Zoti e bekoftë Kosovën”, tha kryeministri Mustafa.
Po sot në mesditë opozita ka njoftuar mbajtje e protestës sipas saj më të madhe që nga paslufta.
Pavarësia do të shënohet me aktivitete të ndryshme, duke filluar nga parakalimi i kuadrateve të FSK-së dhe njësive të Policisë së Kosovës, e deri te dhurimi i gjakut.
Në prishtinë janë marrë masat për festimet, ashtu si duket edhe në këto foto postuar nga Thimi Samarxhiu.
Zeri raporton se parakalimi në shesh përcillet edhe me aktivitete të tjera akrobatike të kadetëve në shesh si dhe nga bendi muzikor i FSK-së.
Po ashtu, në të njëjtën kohë, në orën 10:00, Biblioteka Kombëtare e Kosovës “Pjetër Bogdani”, hap ekspozitën e librit “Kosova në Udhën e Pavarësisë”.
Duke filluar nga ora 11:00 bëhen homazhe para varrit të Presidentit Ibrahim Rugova, ndërkohë që vetëm një orë më pas, në orën 12:00 bëhen homazhe para varrezave të Komandantit Legjendar Adem Jashari dhe familjes Jashari në Prekaz.
Në orën 12:00 do të ketë aktivitet kulturor. Ansambli SHOTA do të defilojë në sheshet “Zahir Pajaziti”, “Nënë Tereza” dhe “Ibrahim Rugova”.
Ndërkaq, në orën 20:00 Baleti Kombëtar i Kosovës në Teatrin Kombëtar shfaq Baletin “Dasma” me regji e koreografi të Mehmet Ballkan.
Sa i përket bashkangjitjes së komunave në këto aktivitet, Qeveria ka njoftuar se të gjitha komunat në orën 09:00 bëjnë homazhe në varrezat e dëshmorëve dhe tek shtatoret e heronjve të Kosovës.
NDIQE LIVE "PANORAMA TV" © Panorama.al