Delegacioni i Komisionit të Venecias “rikthen” në Parlament opozitën.
Sipas axhendës së takimeve, delegacioni i Komisionit të Venecias ka nisur sot takimet me Grupin e PS-së, i kryesuar nga Taulant Balla.
Ndërkohë që pas këtij takimi, rreth orës 11:35 do të takohet me Grupin e demokratëve i kryesuar nga Edmond Spaho.
Të gjitha takimet do të zhvillohen në Kryesinë e Kuvendit. Po në Kryesi është programuar rreth orës 12:30 takimi me Grupin Parlamentar të LSI-së.
Pas këtyre takimeve delegacioni i Venecias do të drekojë në Vilën qeveritare nr. 31 dhe më pas do të ketë një takim me Presidentin, Ilir Meta.
Pasdite është programuar takimi me ministren e Drejtësisë, Etilda Gjonaj dhe më pas takimi më shefin e delegacionit të BE-së, Luigi Soreca.
Komisioni i Venecias po viziton Shqipërinë në kuadër të propozimit të demokratëve për veting, edhe në politikë.
Delegacioni me gjashtë anëtarë dhe që drejtohet nga presidentja e nderit të Komisionit Venecias, Hanna Suchocka, i cili do zhvillojë sot dhe nesër një seri takimesh me përfaqësuesit politikë në vend për t’u njohur gjerësisht me propozimin e Partisë Demokratike për të kaluar në sitë integritetin e politikanëve në vend, kjo për qëllim dekriminalizimin dhe shkëputjen e lidhjeve me krimin.
Delegacioni i raporterëve që do të përgatisin
Opinion për Shqipërinë, përbëhet si më poshtë:
- Znj.Hanna Suchocka (Poloni,Presidente Nderi e Komisionit të Venecias, ish anëtare e Komisionit)
- Znj. Veronika Bilkova (Republika çeke, ish-zëvendëspresidente e Komisionit të Venecias)
- Z.Jørgen Steen Sørensen (Danimarka, anëtar i Komisionit të Venecias)
- Z. James Hamilton (Irlanda, ish anëtarzëvendësues, i Komisionit të Venecias).
- Znj. Artemiza-Tatiana Chisca, nga Sekretariati i Komisionit të Venecias.
- Znj. Adelina Albrahimi, Përkthyese
- Znj. Engjellushe Shqarri, Përkthyese
