E shtrirë në krevatin lëvizës dhe e asistuar me aparatura mjekësore u soll në Klinikën Infektive me autoambulancë, pasditen e së mërkurës, një paciente e konfirmuar me COVID-19 nga Komuna e Vushtrrisë.
Pesë minuta pas mbërritjes, ajo u dërgua në objektin e Mjekësisë Sportive, aty ku pacientët e infektuar me COVID-19 janë duke u trajtuar me oksigjenoterapi.
Ekipi i KOHËS, gjatë qëndrimit për afro tri orë në ambientet e QKUK-së, pa nga afër edhe shumë autoambulanca të tjera që sillnin nga vende të ndryshme të Kosovës pacientët e dyshuar me COVID-19, apo me probleme të tjera shëndetësore.
Me pamje të tilla, prej katër muajsh, përveç stafit mjekësor të Klinikës Infektive, janë duke u përballur edhe pacientët e familjarët e tyre.
Trajtimin në këtë klinikë prej dy javësh po e vazhdon R. Krasniqi nga Komuna e Prishtinës, i cili është infektuar me COVID-19.
Ai kishte dalë në ballkonin e dhomës ku ishte vendosur, teksa tregon se është i kënaqur me stafin mjekësor. Por, Krasniqi ka një shqetësim. Ai e konsideron mundësi të përhapjes së virusit shoqërimin e personave të infektuar nga familjarët.
Ndërkohë që R. Krasniqi, nga ballkoni i Klinikës Infektive, ka apeluar te qytetarët që t’i respektojnë masat dhe ta marrin më seriozisht çështjen e virusit, M. Cakolli, një tjetër qytetar, tregon arsyen se pse po qëndronte te Klinika.
NDIQE LIVE "PANORAMA TV" © Panorama.al