Kur u vendos para kavaletit për të pikturuar kishën, kur mbushi faqet e saj me dritë dhe kaltëroi qiellin, Anila N. Zajmi nuk e dinte se ajo vepër do të kishte një tjetër fat nga ai i çdo tabloje tjetër që kishte realizuar deri atëherë. Ishte një surprizë e vërtetë kur i kërkuan që piktura e saj t’i dhurohej Papa Françeskut, në përvjetorin e ditëlindjes së tij. Ishin drejtues të lartë të pushtetit lokal dhe specialistë të artit, në zonën ku ajo jeton, në Pulia, që i shprehën dëshirën për t’i dhuruar Papa Françeskut pikërisht një vepër të piktores shqiptare. Piktura e realizuar nga Zajmi, vajza e Piktorit të Popullit Nexhemdin Zajmi, është në punuar në vaj dhe paraqet një kishë të njohur në Altamura (Bari), në përmasa 90 me 50 cm. Ajo iu dorëzua Atit të Shenjtë në Vatikan pak ditë më parë.
Anila Zajmi bashkë me familjen jeton dhe punon prej shumë vitesh në vendin fqinj.
Anila është e martuar dhe nëna e një vajze, Lydras, e cila nuk ndoqi rrugën e së ëmës apo gjyshit të saj, që ka lënë pas një fond të çmuar në pikturë. E laureuar si inxhiniere mjedisi, ajo punon në Institutin e Mjedisit dhe të Ambientit në Bari. Ndonëse e larguar prej vitesh, Shqipëria mbetet pikë referimi për të. E njeh me pëllëmbë. Dikur, restauratore në Institutin e Monumenteve, ka shkelur në zonat 
më të thella për t’u kujdesur për trashëgiminë kulturore, për të restauruar mozaikë e afreske në kishat e harruara të Shqipërisë. Deti mbetet dashuria e saj. Do të ishte bërë një notare shumë e mirë, pasi e ka ushtruar me pasion këtë sport, duke përshkuar disa herë në ditë distancën Hekurudha – Iliria, në bregun e Durrësit. Por Anila zgjodhi të ecë në gjurmët e të atit e sot, një vepër e saj gjendet në Selinë e Shenjtë.
