Kërkesa e Pfizer për dozën e tretë përforcuese të vaksinës/ Sot mblidhet paneli i ekspertëve në SHBA, ja çfarë pritet

Sep 17, 2021 | 21:08
SHPËRNDAJE

Paneli këshillues i Administratës Amerikane të Ushqimit dhe Barnave (FDA) po mblidhet të premten për të shqyrtuar kërkesën e kompanisë Pfizer-BioNTech për të ofruar dozën e tretë përforcuese të vaksinës për COVID-19 për pacientët 16 vjeç e lart.

apap

Në një takim të hapur njëditor, Komisioni Këshillues i Pavarur i Vaksinave dhe Produkteve Biologjike të lidhura me vaksinat ((VRBPAC)) do të debatojë nëse një dozë përforcuese është e sigurt për përdorim të gjerë dhe nëse është e nevojshme dhe efektive në përmirësimin e nivelit të mbrojtjes kundër COVID -19-ës.

Në fillim të kësaj jave, kompania Pfizer i dorëzoi të dhëna FDA-së që thonë se efikasiteti i vaksinës së saj bie me rreth gjashtë përqind çdo dy muaj pas dozës së dytë, duke e bërë një doze përforcuese pas gjashtë muajsh të sigurt dhe efektive në rritjen e mbrojtjes kundër virusit që shkakton COVID-19-ën.

Komisioni pritet të votojë të premten nëse doza përforcuese është e sigurt dhe madje edhe nëse ajo është e nevojshme. FDA nuk është e detyruar të ndjekë rekomandimet e panelit, por në përgjithësi ajo e bën një gjë të tillë. Javën e ardhshme, paneli këshillues i Qendrave për Kontrollin dhe Parandalimin e Sëmundjeve (CDC) do të analizojë më në hollësi se kush duhet të marrë një dozë përforcuese dhe kur.

Ndërkohë, Franca ka pezulluar 3,000 punonjës të kujdesit shëndetësor të cilët nuk ishin të vaksinuar kundër COVID-19-së deri në afatin e 15 shtatorit të caktuar nga qeveria.

Disa dhjetëra, prej 2.7 milionë punonjësve shëndetësorë të vendit, tha të enjten Ministri i Shëndetësisë Olivier Veran, zgjodhën të japin dorëheqjen, në vend që të bëjnë vaksinën kundër koronavirusit.

Dhjetëra mijëra punonjës shëndetësorë nuk ishin të vaksinuar në korrik kur Presidenti Emmanuel Macron njoftoi afatin e 15 shtatorit për të pasur të paktën një dozë të vaksinës.

Ministri Veran tha se shumica e punonjësve të pezulluar punonin në shërbime dytësore dhe shumë pak mjekë dhe infermierë ishin në mes të të pezulluarve.

Sipas të dhënave të fundit nga Universiteti Johns Hopkins, Franca ka regjistruar më shumë se 7 milionë raste infektimesh me Covid dhe më shumë se 116,000 vdekje.

Ndërkohë, në Shtetet e Bashkluara, në shtetin amerikan të Ajdahos, spitalet kanë filluar ta kufiojnë kujdesin shëndetësor “sepse rritja masive e pacientëve me COVID-19, që kanë nevojë të shtrohen në spital në të gjitha zonat e shtetit ka tkurrur burimet ekzistuese,” tha Departamenti i Shëndetit dhe Mirëqenies në Ajdaho të enjten.

“Situata është e tmerrshme – nuk kemi burime të mjaftueshme për të trajtuar pacientët në spitalet tona, pavarësisht nëse shtrohesh për COVID-19 ose një goditje në zemër ose për shkak të një aksidenti automobilistik,” tha Drejtori i Departamentit, Dave Jeppesen në një deklaratë.

Mënyra më e mirë për ta shmangur këtë situate “është që më shumë njerëz të vaksinohen,” tha zoti Jeppesen. “Kjo zvogëlon në mënyrë dramatike shanset për të shkuar në spital nëse sëmuresh nga COVID-19.”

Fondi Monetar Ndërkombëtar, Banka Botërore, Organizata Botërore e Shëndetësisë dhe Organizata Botërore e Tregtisë janë takuar me prodhuesit kryesorë të vaksinave COVID për të hartuar strategji për të përmirësuar qasjen ndaj vaksinave për vendet me të ardhura të ulëta dhe të mesme.

Qëllimi i koalicionit është të vaksinojë të paktën 40% të personave në çdo vend deri në fund të këtij viti dhe të paktën 60% deri në mesin e vitit 2022.

OBSH tha se arritja e objektivit është “kritike për t’i dhënë fund pandemisë dhe për rimëkëmbjen ekonomike globale.” /VOA/

© Panorama.al

Te lidhura


Subscribe

      
             

Për t’u bërë pjesë e grupit të "Panorama" mjafton të klikoni: Join Group dhe kërkesa do t’ju aprovohet.
KOMUNITETI PANORAMA ONLINE: https://facebook.com/groups/panoramaonline/