“Lufta” kundër plakjes është një sfidë e madhe dhe ka shumë faktorë të stilit të jetesës që ndikojnë.
Në këtë rrugëtim të vështirë, megjithatë, ne kemi “aleatë”, që fshihen në zakonet më të thjeshta të përditshme.
Një i tillë është ushqimi, i cili padyshim luan një rol vendimtar në shëndetin e organizmit.
Një trup i shëndetshëm përfshin para së gjithash një tru të fortë. Dhe sipas një hulumtimi të fundit, të publikuar në BMC Medicine, ku janë analizuar faktorët që ndikojnë në funksionin e trurit, një rol të konsiderueshëm luan dieta.
Në veçanti, studiuesit nga Universiteti i Newcastle argumentojnë se ata që konsumojnë një dietë mesdhetare përballen me një rrezik të reduktuar deri në 23% të zhvillimit të demencës.
Në studim u përfshinë 60.298 njerëz në Britani për gati 1 dekadë. Gjatë hulumtimit dhjetëvjeçar, u identifikuan 882 raste të demencës.
Sipas rezultatit përfundimtar, njerëzit që kanë rrezik gjenetik për zhvillimin e demencës, mund të zvogëlojnë shanset duke konsumuar një dietë mesdhetare.
Adoptimi i një diete të shëndetshme mund të përfshihet në strategjitë e ardhshme për të zvogëluar rrezikun e demencës.
“Dementia ndikon në jetën e miliona njerëzve në mbarë botën dhe opsionet e trajtimit për ta trajtuar janë jashtëzakonisht të kufizuara. Prandaj është prioriteti ynë që të zbulojmë mënyra për të reduktuar rrezikun e zhvillimit të këtij mosfunksionimi të trurit. Studimi ynë tregon se një diete mesdhetare mund të ndihmojë në reduktimin e këtij kërcënimi për shëndetin e trurit”, tha mjeku Oliver Shannon.
“Lajmi i mirë është se edhe njerëzit që kanë rrezik më të lartë gjenetik mund të zvogëlojnë mundësinë e tyre për të zhvilluar demencën përmes ushqyerjes së duhur. Megjithëse nevojiten kërkime të mëtejshme, zbulimet e reja përforcojnë një mesazh të rëndësishëm të shëndetit publik”, komentoi John Mathers.
“Gjetjet nga ky studim i madh i bazuar në popullatë nxjerrin në pah përfitimet afatgjata për shëndetin e trurit nga ngrënia e një diete mesdhetare të pasur me fruta, perime, drithëra dhe yndyrna të shëndetshme. Përpjekjet për parandalimin e demencës mund të shkojnë përtej këshillave të përgjithshme për konsumimin e ushqimit të shëndetshëm dhe të fokusohen në ngrënien e ushqimeve specifike dhe lëndëve ushqyese që janë thelbësore për shëndetin e trurit”, shtoi Janice Ranson, nga Universiteti i Exeter.
NDIQE LIVE "PANORAMA TV" © Panorama.al
