Atalanta, Milan, Napoli dhe Juventus, katër skuadra në garë për tri vende të mundshme në Champions-in e sezonit të ardhshëm. Kur mungojnë tri ndeshje nga fundi i këtij kampionati, Interi është e vetmja që e ka siguruar matematikisht këtë objektiv, ndërsa me humbjen e pësuar mbrëmjen e djeshme, “Zonja e Vjetër” është më keq nga të gjitha dhe nuk po flasim vetëm për faktin se me 69 pikë ka zbritur në vend të pestë, por edhe duke parë moralin e skuadrës juventine.
Pas Interit, shumë më të qetë për 270 minutat finale janë Atalanta dhe Milani në vendin e dytë dhe të tretë në kuotë të barabartë pikës (72), ndërsa Napoli renditet i katërti me 70. Situata është tmerrësisht e komplikuar, por me kriteret që janë qartësuar edhe më shumë pas ndeshjes së mbrëmjes së djeshme në Torino, ja kush janë ekipet që do të kualifikohen në Champions 2021-2022, në rast pikësh të barabarta.
KRITERET BAZË
– Pikë të fituara në përballjet direkte.
– Diferenca e golave në përballjet direkte.
– Diferenca e përgjithshme e golave në fund të kampionatit
– Gola total, realizuar nga dy skuadrat.
– Short, në rast baraspeshe të katër pikave të mësipërme.
Më poshtë janë të gjitha kombinimet dhe situatat në avantazh të secilës prej katër skuadrave në garë për Champions-in, në rast pikësh të barabarta në fund, ndonëse për të kompletuar totalisht tablonë finale pritet vetëm dueli direkt i fundit në kalendar, Atalanta-Milan. Gjithsesi, deri atëherë ja si është situata aktuale, duke menduar nëse me pikë të barabarta përfundojnë vetëm dy ekipe:
– Juventus dhe Milan: Milani në avantazh, si rrjedhojë e diferencës së golave në përballjet direkte.
– Juventus dhe Napoli: Napoli në avantazh, si rrjedhojë e golavarazhit total aktual.
– Juventus dhe Atalanta: Atalanta në avantazh, si rrjedhojë e pikëve në përballjet direkte. – Milani dhe Napoli
– Milani në avantazh, si rrjedhojë e diferencës së golave në përballjet direkte.
– Milan dhe Atalanta: Atalanta në avantazh, si rrjedhojë e golavarazhit total aktual, por pritet të luhet ndeshja e kthimit.
– Napoli dhe Atalanta: Napoli në avantazh, si rrjedhojë e golavarazhit në përballjet direkte.
NDIQE LIVE "PANORAMA TV" © Panorama.al
