Sot, në orën 17:00 do të zhvillohen 90 minutat e fundit të këtij edicioni futbollistik në Kategorinë Superiore.
Në stadiumin “Selman Stërmasi” do të luhet ndeshja Tirana-Kukësi.
Në kryeqytet sot do të dorëzohet trofeu i kampiones së re të Shqipërisë, ndërsa për verilindorët është e rëndësishme vetëm fitorja për objektivin Europë.
Në stadiumin e qytetit të Laçit do të luhet takimi Laçi-Partizani.
Një ndeshje jo shumë me rëndësi pasi si kurbinasit po ashtu edhe të kuqtë e Dritan Mehmetit e kanë siguruar zyrtarisht pjesëmarrjen për sezonin e ardhshëm në Europë.
Në stadiumin e qytetit të Kamzës do të zhvillohet takimi Kastrioti-Vllaznia.
Krutanët e kanë siguruar qëndrimin në Superiore, ndërsa shkodranët duan me çdo kusht tre pikëshin për një vend në Europë.
Në stadiumin “Skënderbeu”, do të luhet dueli Skënderbeu-Teuta.
Një ndeshje që për korçarët ëshë thjesht për statistikë duke parë se vitin e ardhshëm do të militojnë në Kategorinë e Parë, ndërsa durrsakët duan suksesin për zonën Europiane.
Në stadiumin “Arena Egnatia” do të zhvillohet sfida Egnatia-Dinamo.
Një ndeshje thjesht për statistikë duke parë se rrogozhinasit do të luajnë ndeshjen “Play-Out” ndaj Korabit, kurse blutë e kryeqytetit kanë zbritur në Kategorinë e Parë.
Java e fundit luhet gjithashtu edhe për “Këpucën e Artë”, ku Taulant Seferi i Tiranës dhe Saliu Guindo i Laçit janë në kuotën e 18 golave.
NDESHJET E DITËS SË SOTME NË KATEGORINË SUPERIORE –
NDIQE LIVE "PANORAMA TV" © Panorama.al