“Me Kastriotin dhe më pas do e kemi më të qartë se te cili grup do jetë Partizani”. Ky ishte mesazhi që dha trajneri Skënder Gega pas fitores në transfertën e Kamzës. Paraqitja me oshilacione e skuadrës në dy ndeshjet e para e kanë vënë stafin teknik para një vështirësie të madhe për ndërtimin e formacionit. Ata që e “mërzitën” në Korçë trajnerin Gega dhe që në njëfarë mënyrë i ndëshkoi duke mos i përzgjedhur si titullarë ndaj Kamzës, e nderuan ekipin në pjesën e dytë kur hynë në fushë. E kundërta ndodhi me ata që dhanë shkëndija me Skënderbeun, por që u fikën ndaj Kamzës.
Një tjetër aspekt që trajneri akoma nuk po i jep zgjidhje është mënyra e transformimit të lojtarëve, pasi ndryshe angazhohen në stërvitje, ku bazohet plani për ndërtimin e formacionit, dhe ndryshe paraqiten në fushë. Referuar paraqitjes së Partizanit në 180 minuta e para, trajneri Skënder Gega është i detyruar që ndaj Kastriotit në ndodhë transformimi i radhës në formacionin bazë. Ekipi ka nisur javën stërvitore për ndeshjen me Kastriotin, që është i pari në shtëpi për këtë sezon, por që do të luhet pa praninë e tifozëve. Ndonëse është herët për të folur për njëmbëdhjetëshin anti-Kastriot, me shumë mundësi pritet që stafi të bëjë disa ndryshime në formacion nisur nga grupi që nisi derbin e vogël me Kamzën. Enigma më e madhe që mbetet për t’u zgjidhur është kompozimi i fazës sulmuese.
Të ardhurit në merkato, Hebaj dhe Mensah, akoma nuk janë përshtatur me “demat”, ndaj nuk është çudi që ndaj krutanëve të kthehet formacioni që luajti në Ligën e Europës ndaj Mariborit. Asani dhe Progni i dhanë gjallëri lojës së Partizanit kur hynë në fushë ndaj Kamzës, ndaj nuk është çudi që t’u besohet atyre nga fillimi këtë të shtunë. Probleme përqendrimi ka shfaqur edhe mbrojtja, e cila neglizhon shumë në momentin final dhe për këtë shkak kanë ardhur edhe dy penalltitë e shkaktuara në dy javët e fundit Gjithçka ka ardhur nga reagimi në kundërkohë i mbrojtjes. Dyshja e qendrës që ka luajtur në 180 minuta e para, Belica-Atanda nuk ka arritur të koordinohet si duhet, kjo mbase nga fakti se mbrojtësi nga Struga ka pasur si partner Gojkoviç në sezonin e shkuar.
NDIQE LIVE "PANORAMA TV" © Panorama.al