MARIGLEN KUME/ Shqipëria kishte rreth një vit që kishte hequr karantinën për shqiptarët që vinin nga Greqia apo Italia.
Komiteti Teknik i Ekspertëve kundër pandemisë nuk e gjykoi të nevojshme karantinimin e shqiptarëve që vinin nga Greqia dhe Italia në sezonin e verës së 2020- ës, ku numri i emigrantëve që ktheheshin në vendet e tyre ishte i madh.
Po ashtu, komiteti nuk detyroi karantinimin e shqiptarëve që vinin nga vendet fqinje edhe në fundvitin që shkoi, që po ashtu numri i atyre që kaluan festat ishte i madh. Por teksa Kryeministri Rama thotë se Shqipëria po sheh dritë në fund të tunelit për shkak të numrit të lartë të vaksinimit, Komiteti Teknik i Ekspertëve vendosi dy ditë më parë që pas një viti të rikthejnë karantinën për qytetarët që vijnë nga Greqia dhe Maqedonia e Veriut. Kjo masë përkon me fetën e pashkës dhe me zgjedhjet parlamentare që mbahen më 25 prill.
“Komiteti Teknik i Ekspertëve ka vendosur që për dy javët e ardhshme, personat që vijnë nga Maqedonia e Veriut dhe Greqia bëjnë karantinë, për të kufizuar përhapjen e Covid-19, nisur nga situata në këto vende, si dhe për shkak të lëvizjes së shtuar të pritshme, nga pashkët ortodokse”, njoftoi Ministria e Shëndetësisë dy ditë më parë. Kjo masë e Komitetit Teknik ua pamundëson të drejtën për të votuar atyre që vijnë në Shqipëri këtë javë apo edhe ditën e zgjedhjeve.
Ndërkohë kujtojmë që në reformën zgjedhore të qershorit të kaluar vota e emigrantëve ka qenë kalë beteje. Po ashtu, kujtojmë që ka edhe një ministër për Diasporën që është angazhuar publikisht për t’u dhënë mundësi shqiptarëve që jetojnë jashtë që të votojnë nga atje ku jetojnë. Kjo përpjekje dështoi, por pas vendimit të Komitetit Teknik, edhe ata që kanë vullnetin të vijnë të votojnë në vendin tonë nuk do të lejohen.
RREGULLAT E VOTIMIT
Sakaq Instituti i Shëndetit Publik publikoi dje edhe protokollin që duhet të ndjekin votuesit dhe organizuesit e zgjedhjeve më 25 prill. ISHP rekomandon KQZ që qendrat e votimit të jenë në katet e para të godinave. Ndërsa sallat e votimit rekomandohet që të kenë një derë hyrëse dhe një derë dalëse. Por duke qenë se qendrat e votimit janë kryesish në ambientet e shkollave, duket se këtë kusht jo të gjitha shkollat e plotësojnë. Ndërkohë përfaqësuesit e Komisionit Qendror të Zgjedhjeve duhet të vendosin shenja të qëndrimit të votuesve në qendrën e votimit dhe në sallën e votimit për të ruajtur distancën. Kështu një votues duhet të ketë patjetër një maskë të vendosur në momentin që paraqitet për të votuar. Në hyrje të qendrës së votimit organizatoret duhet të vendosin alkool për dezinfektim.
Ndërkohë, sa i përket ambientit të sallës së votimit, ISHP-ja në protokollin e saj rekomandon që komisionerët të ulen në distancë 1.5 m nga njëri-tjetri. Largësia nga kutia e votimit dhe dhoma e fshehtë e komisionerëve duhet të jetë 2 metra, ndërsa dhomat sekrete të votimit duhet të jenë në një distancë 1.5 metër nga njëra-tjetra. Vlen për t’u theksuar se në sallën e votimit nuk duhet të ketë më shumë se sa është numri i dhomave sekrete herë atë numër që janë votuesit të cilët vijojnë procesin e regjistrimit për votim. Në ambientet e qendrës së votimit duhet të ketë patjetër tualete me ujë të rrjedhshëm dhe sapunë. Ndërkohë, komisionerët dhe vëzhguesit e akredituar duhet të plotësojnë një formular paraprakisht se nuk kanë temperaturë, ethe apo ndonjë simptomë tjetër të Covid-19.
NDIQE LIVE "PANORAMA TV" © Panorama.al
