Kryeministri Edi Rama ka reaguar sërish duke ju drejtuar grave naftëtare që janë në grevë urie prej 15 ditësh, t’i japin mundësi qeverisë t’i ndihmojë.
Rama thekson se nuk i ka ftuar në asnjë negociatë, “sepse nuk kemi asgjë për të negociuar pasi qeveria as nuk e ka shkaktuar hallin tuaj, as nuk trashëgon mbi vete problemin e krijuar nga kompania private!”.
Në postimin në Twitter, Rama thotë se “ideja se punonjësit e një kompanie private mund të bëjnë grevë kundër qeverisë për detyrimet e sipërmarrësit privat është e gabuar”.
POSTIMI I PLOTE I RAMES
Edhe njëherë: Nuk ju kam ftuar në asnjë negociatë, sepse nuk kemi asgjë për të negociuar pasi qeveria as nuk e ka shkaktuar hallin tuaj, as nuk trashëgon mbi vete problemin e krijuar nga kompania private! Rafineria nuk është e shtetit. Ju lutem na jepni mundësinë t’ju ndihmojmë!
Ideja se punonjësit e një kompanie private mund të bëjnë grevë kundër qeverisë për detyrimet e sipërmarrësit privat është e gabuar. Ju nuk e doni daljen në asistencë dhe e mirëkuptojmë, por ju’a përsëris, pa mbyllur grevën nuk ju’a qajmë dot hallin konkretisht përtej asistencës!
NDIQE LIVE "PANORAMA TV" © Panorama.al
