Ambasadorja e SHBA në Tiranë, Yuri Kim, ka takuar sot kryeministrin Edi Rama, Presidentin Ilir Meta dhe kreun e PD-së, Lulzim Basha.
Me një deklaratë për mediat, ambasadorja e SHBA bën me dije se është takuar me udhëheqësit shqiptarë për të diskutuar sa i përket konferencës së donatorëve dhe pritshmërive për transparencë dhe llogaridhënie përgjatë gjithë procesit të rindërtimit.
Veç kësaj, në takim është folur gjithashtu edhe për hapat që duhet të ndërmarrë vendi ynë në javët e muajt në vijim.
“Presim që udhëheqësit shqiptarë të sillen në mënyrë të tillë që të jetë e përgjegjshme dhe për të mirën e popullit shqiptar”, shkruan mes të tjerash Kim.
“Sot u takova me Kryeministrin Edi Rama, Presidentin Ilir Meta dhe Kryetarin e Partisë Demokratike Lulzim Basha për të diskutuar mbi zhvillimet e fundit dhe pritshmëritë e Shteteve të Bashkuara. Për sa i përket specifikisht, konferencës së donatorëve në Bruksel, ne besojmë se ajo pasqyron solidaritetin, mbështetjen dhe dëshirën e komunitetit ndërkombëtar për ta ndihmuar popullin shqiptar në përpjekjet e rindërtimit pas tërmetit. Diskutuam gjithashtu edhe për pritshmëritë për transparencë dhe llogaridhënie përgjatë gjithë këtij procesi. Përveç konferencës së donatorëve, diskutova edhe për hapat e rëndësishëm që Shqipëria duhet të ndërmarrë në javët e muajt e ardhshëm, duke treguar pjekuri, respekt për institucionet dhe besim në proceset demokratike. Presim që udhëheqësit shqiptarë të sillen në mënyrë të tillë që të jetë e përgjegjshme dhe për të mirën e popullit shqiptar. Ne e sigurojmë popullin shqiptar se ne do të jemi aty për të vëzhguar dhe kontribuar”, tha ambasadorja.
NDIQE LIVE "PANORAMA TV" © Panorama.al