Ish-ministri i Jashtëm i PD përshëndet vendimet e Samitit të NATO-s: Ne jemi sot një aleancë më e bashkuar, më e qartë, dhe më e fortë

Jun 30, 2022 | 15:24
SHPËRNDAJE

Anëtari i Kryesisë së Partisë Demokratike, Aldo Bumçi, ka reaguar në lidhje me vendimet e rëndësishme të marra në Samitin tre ditor të NATOS-s që u mbajt në Madrid.

aldo bumci 5

Përmes një deklarate për media, Bumçi theksoi se Partia Demokratike përshëndet vendimet e marra në Samit për mbështetjen e Ukrainës, si dhe për zgjerimin e aleancës me përfshirjen e Suedisë dhe Finlandës.

DEKLARATË E PARTISË DEMOKRATIKE, ANËTARI I KRYESISË, ALDO BUMÇI

Partia Demokratike përshëndet firmosjen e marrëveshjes tripalëshe mes Turqisë, Suedisë dhe Finlandës, që i hap rrugë antarësimit të dy vendeve nordike në NATO.

Me krenarinë dhe përgjegjësinë e qeverisjes që kurorëzoi anëtarësimin e Shqipërisë në Aleancën e mbrojtjes kolektive më të sukseshme të globit, Partia Demokratike përshëndet zgjerimin e Aleancës drejt këtyre vendeve mike e demokratike, të rreshtuara qartë në anën e drejtë të historisë.

Fakti që Stokholmi dhe Helsinki i japin fund asnjanësisë së gjatë, është dëshmi e qartë se, pushtimi rus i Ukrainës është një kërcënim alarmues për të gjithë Europën dhe botën.

Si vend i Ballkanit, ku interesat dhe ndikimi rus janë rrezikshëm të pranishëm, Shqipëria duhet të jetë edhe më shumë e vëmendshme ndaj zhvillime të tilla.

Duke përshëndetur vendimin historik për zgjerimin dhe forcimin e NATO-s, dhe si vend anëtar, u urojmë mirëseardhjen Suedisë dhe Finlandës.

Partia Demokratike mbetet mbrojtëse e palëkundur e arkitekturës së sigurisë euro-atlantike dhe e vlerave të saj të patjetërsueshme.

© Panorama.al

Te lidhura