Ndërkohë që nuk kanë arritur ende një marrëveshje parazgjedhore me Partinë Demokratike, kreu i Partisë Republikane, Fatmir Mediu tha nga Shkodra se ajo që kërkojnë, është që të ndërtojnë një raport të drejtë, “në mënyrë që dhe votat e Partisë Republikane në Kukës, në Dibër, në Gjirokastër, apo në cdo rreth, t`i shtohen Partisë Demokratike”.
Sipas Mediut, “edhe në këtë rast interesi është i Partisë Demokratike”.
Kreu i PR, nënvizoi se PD-së i duhen votat e Partisë Republikane, ndaj, “ajo që i kemi kërkuar Partisë Demokratike është le të vendosim disa kritere, të cilat janë të barasvlefshme për Partinë Demokratike, për Partinë Demokristiane, për partinë e të Drejtave të Njeriut , për partinë came dhe të gjithë partive që janë në koalicion”.
“Partia Republikane në vitin 2013 në Shkodër, për 40 vota nuk ka marrë mandatin e deputetit.
Pyetja është e thjeshtë. A i duhen Partisë Demokratike 4,800 votat e Partisë Republikane?
Unë mendoj që po të bëjmë një arithmetikë të thjeshtë, patjetër i duhen, se në 2017 humbëm dhe 4000 vota të tjera.
Pra duhet të shtojmë për të marrë mandatin e pestë edhe 4000 të tjera. Atëherë si mund të përjashtojmë nga procesi kandidimin e njerëzve të Partisë Republikane.
Ajo që i kemi kërkuar Partisë Demokratike është e tillë; të dashur miq le të vendosim disa kritere, kritere të cilat janë të barasvlefshme për Partinë Demokratike, për Partinë Demokristiane, për partinë e të Drejtave të Njeriut , për partinë came dhe të gjithë partive që janë në koalicion, sepse një transparencë dhe kritere të barabarta, ndërtojnë një raport të drejtë, në mënyrë që dhe votat e Partisë Republikane në Kukës, në Dibër, në Gjirokastër, apo në cdo rreth, t`i shtohen Partisë Demokratike dhe në këtë rast interesi është i Partisë Demokratike.
Por si mund të shtohen votat e Partisë Republikane, në qoftë se Partia Republikane përjashtohet nga mundësia e kandidimit në Shkodër.
Nuk kërkuam privilegj, as zonë të lirë, por po kërkojmë njerëz që të kontribuojnë në fitoren e opozitës.
Prandaj te bashkohemi ne Shkoder dhe mbare Shqiperine ne dt 25 Prill per ta rikthyer vendin ne rrugen dhe vlerat Europiane’.
Mediu ndër të tjera kujtoi se “ne u krijuam si parti antikomuniste, për t`u shndërruar më vonë në një parti me besimin tek vlerat e jetës, lirisë dhe ndërtimit të lumturisë, të drejta këto të patjetërsueshme të dhëna nga Zoti. Nga krijimi i Partisë Republikane dhe deri më sot, ne kemi qenë dhe jemi aleatë, bashkëudhëtarë dhe bashkëkontribues me Partinë Demokratike dhe forcat e djathta”.
NDIQE LIVE "PANORAMA TV" © Panorama.al
