| Tirane |
|
| Durres |
|
| Vlore |
|
| Shkoder |
|
| Korce |
|
|
|
|
Pronat, AKKP do shqyrtojė 8 mijė ankesa |
|
»
Vendosur: 29/10/2009 - 09:10
|
•
BLEDAR HOTI
Qeveria i jep të drejtën Agjencisë së Kthimit dhe Kompensimit të Pronave që të shqyrtojë 8 mijë ankesat, që nuk kanë marrë ende zgjidhje ligjore. Në mbledhjen e djeshme të Qeverisë, Kryeministri Sali Berisha ka bëri të ditur se do t’i paraqitet Kuvendi, ndryshimi ligjor për t’i dhënë mundësinë e shqyrtimit të kërkesave të paraqitura. Sipas këtij ndryshimi, autorizohet Agjencia e Kthimit dhe Kompensimit të Pronave të marrë në shqyrtim të gjitha ankesat e paraqitura para datës 30 qershor. Duke sqaruar ndryshimin që i bëhet ligjit, Kryeministri Berisha tha se: “Nuk do të ketë më zgjatje afati për paraqitjen e kërkesave pranë Agjencisë të Kthimit dhe Kompensimit të Pronave, por ligjvënësi duhet të autorizojë Agjencinë që të shqyrtojë të gjitha ankesat e paraqitura para datës 30 qershor, të cilat janë 8 mijë dhe nuk u shqyrtuan dot në afat”. “Ne duhet të autorizojmë me ligj Agjencinë që ankesat e ardhura para datës 30 qershor dhe që kanë mbetur pa u shqyrtuar të marrin përgjigje në mënyrë që Agjencia të shkojë drejt shuarjes së saj natyrale, përmbushjes së detyrimit dhe ndërprerjes së aktivitetit të saj”, theksoi Kryeministri. Neni 24 i ligjit “Për kthimin dhe Kompensimin e Pronave” përcaktonte se: “Procesi i njohjes, kthimit dhe kompensimit të pronave të paluajtshme përfundon deri në datën 31.6.2008”. Nisur nga kjo situatë, qeveria i ka menduar t’i japë mundësi AKKP-së që të shqyrtojë këto ankesa.
Reagimi i shoqatës
Përfaqësuesit e shoqatës “Pronësi me Drejtësi” kanë kundërshtuar dje deklaratën e Kryeministrit për shkrirjen e AKKP-së. “Jemi totalisht kundër këtij vendimi të Kryeministrit Berisha. Jemi habitur nga deklarata e tij, pasi AKKP-ja ka detyrimin t’i kthejë përgjigje çdo pronari për kërkesën që ka për kthim, njohje apo kompensim prone. Duhet ta dini se ka me dhjetëra pronarë që enden nëpër gjykata dhe nuk kanë pasur mundësi të paraqesin kërkesën e tyre. Qeveria s’duhet t’ia mbyllë derën pa u dhënë zgjidhje kërkesave të ish-pronarëve. Të thuash se nuk ka më kërkesa nga ana e ish-pronarëve është totalisht e papranueshme”, deklaroi sekretari i shoqatës, Myrshit Vorpsi. Sipas tij, Qeveria duhet të japë kohë deri në vitin 2014 për shqyrtimin e të gjitha kërkesave që kanë pronarët për kthimin e njohjes së pronës. “Është e papranueshme të mbyllësh këtë detyrim që ka Qeveria ndaj pronarëve. Qeveria ka paqartësi në veprimet e saja. Kryeministri Berisha duhet të zbatojë detyrimin e vënë edhe nga progres raporti i fundit i BE-së për çështjen e pronave. Procesi i AKKP-së absolutisht nuk duhet të shkojë drejt shuarjes, pasi është i vetmi institucion që jep titujt e pronësisë në këtë vend”, theksoi Vorpsi. Ai hedh idenë e një reforme të thellë ligjore për çështjen e pronësisë, pasi sipas tij, situata është krejt tjetër. “Prona duhet të kthehet tek pronari, nuk duhet të bëhet kompensim financiar pa u kryer kthimi fizik më parë. Shteti ka detyrimin që të publikojë faturën financiare mbi këtë proces, gjë të cilën nuk e ka bërë”, theksoi Vorpsi.
Neni 24
Afati i përfundimit të procesit
Procesi i njohjes, kthimit dhe kompensimit të pronave të paluajtshme përfundon deri në datën 31.6.2008, me përjashtim të kryerjes së pagesës së kompensimit, e cila duhet të përfundojë në afatin e parashikuar në nenin 23 të këtij ligji.
Ky nen i ligjit aktual pritet të shfuqizohet nga Parlamenti.
|
|
|
|
|
|
|
PANORAMA & PANORAMA SPORT |
PANORAMA PLUS & UNE GRUAJA |
|
|