| Tirane |
|
| Durres |
|
| Vlore |
|
| Shkoder |
|
| Korce |
|
|
|
|
Alarmi, lagėshtira po shkatėrron 6400 libra |
|
»
Vendosur: 30/03/2009 - 10:28
|
•
BERAT/ DILAVER XHELILI
Librat në bibliotekën e qytetit të Beratit po shkatërrohen pasi ndodhen në mes të lagështisë. Godina e ndërtuar rreth viteve ’70 nuk njeh asnjë ndërhyrje rehabilituese prej dekadash. Janë rreth 6400 libra që rrezikohen për shkak të ambientit aspak të përshtatshëm që është krijuar. Alarmin e bën publik edhe vetë drejtori i kësaj biblioteke, Arben Jaupi. Sipas tij, gjendja në ambientet e saj është tejet e rënduar për shkak të lagështirës. Kjo bibliotekë është e pasur me mjaft libra, duke përmendur këtu edhe letërsinë e shekujve të mëparshëm. Por tashmë kjo pasuri është drejt shkatërrimit. Kërkesa e vazhdueshme e vendorëve për fonde ka rënë në vesh të shurdhër. Askush nuk i është përgjigjur kësaj problematike, veçse vetë shkrimtarët të cilët janë munduar të pasurojnë dhe shtojnë në të sa më shumë tituj. Biblioteka që mban emrin “Vexhi Buharaja” është ndërtuar në vitin 1974. Godina e saj ndodhet në qendër të qytetit dhe ruan tiparet arkitekturore të kohës. Por sot, gjendja është alarmante. Thuajse të gjithë librat që ndodhen në të po dalin jashtë funksionit. Mësohet se kjo bibliotekë është e pasur me 5 mijë libra për të rritur dhe 1400 libra për fëmijë. Punonjësit e kësaj biblioteke shprehin keqardhje për situatën e krijuar. Sipas tyre, lagështira po bën kërdinë duke nxjerrë jashtë funksionit të gjitha këtë pasuri. Të gjitha dhomat janë të pushtuara nga lagështia që po shkatërron gjithçka. Burime nga bashkia bënë të ditur se prej 18 vjetësh, në këtë godinë nuk ka pasur asnjë fond për të rehabilituar ambientet. Drejtori i sapoemëruar i kësaj biblioteke, Arben Jaupi, pohoi problematikën. Sipas tij, lagështira ka depërtuar prej disa vitesh dhe se një pjesë e librave janë shkatërruar. Kjo gjendje është bërë prezente disa herë në ministrinë përkatëse por edhe në bashkinë e qytetit të Beratit. “Kërkesa e vazhdueshme për fonde, për të ruajtur këtë pasuri të madhe të letërsisë ka rënë në vesh të shurdhër. Ne e kemi ngritur disa herë këtë problematikë, por akoma nuk kemi realizuar të marrim fonde e të ndërhyjmë në mënyrë emergjente, për të shpëtuar nga shkatërrimi mijëra libra që ndodhen në bibliotekën tonë”, shprehen punonjës të saj. Biblioteka e Beratit u përfshi nga flakët tre vite më parë, ku u dogjën një numër i konsiderueshëm i librave. Por disa shkrimtarë kontribuan për të ndihmuar bibliotekën me rastin e ditës ndërkombëtare të librit. Sipas specialistëve, nëse biblioteka do të mbetet në këtë gjendje, do të shkatërrohen gjithë librat dhe pasuria e saj. Ndërsa ndërhyrja e mëpasme në godinë do të jetë shumë vonë.
|
|
|
|
|
|
|
PANORAMA & PANORAMA SPORT |
PANORAMA PLUS & UNE GRUAJA |
|
|