| Tirane |
|
| Durres |
|
| Vlore |
|
| Shkoder |
|
| Korce |
|
|
|
|
INSTAT kundėr Bodes: Berisha ka tė drejtė, rritja 9.9 pėr qind |
|
»
Vendosur: 08/01/2009 - 08:52
|
•
Fabiola Çela
Pas replikave të djeshme mes Kryeministrit Berisha dhe ministrit Bode mbi rritjen ekonomike ka reaguar dje edhe INSTAT. Në një deklaratë për mediat drejtues të institutit kanë theksuar edhe një herë, se rritja ekonomike deri në fund të muajit shtator është 9.9 për qind. Madje si për të treguar vërtetësinë e këtyre shifrave zyrtarët e INSTAT-it kanë deklaruar, se kjo shifër është konfirmuar edhe nga eksperti i Fondit Monetar Ndërkombëtar.
Rritja ekonomike
“INSTAT e ka ndjekur me vëmendje debatin në lidhje me shifrat e rritjes ekonomike në Komitetin e Planifikimit të Strategjive. INSTAT konfirmon që rritja ekonomike me bazë tremujore deri në muajin shtator të këtij viti, duke përfshirë katër tremujorë (i katërti 2007 plus 3 tremujorët e parë 2008) është 9.9 % dhe deri tani nuk disponon asnjë të dhënë tjetër mbi këtë tregues”, ka thënë dje zv/drejtorja e Përgjithshme e INSTAT Ledia Thomo. Madje, sipas saj kjo shifër është konfirmuar dhe nga eksperti i Fondit Monetar Ndërkombëtar, i cili ka punuar në INSTAT dhe është dërguar në formën e një raporti zyrtar. “Sigurisht që kjo nuk është shifër përfundimtare, pasi të dhënat për rritjen ekonomike janë objekt i revizionimit të vazhdueshëm në kohë”, ka theksuar Thomo.
Debati
Treguesit e rritjes ekonomike, janë kthyer në një objekt debati jo vetëm mes pozitës dhe opozitës, por ka krijuar përplasje edhe mes kreut të qeverisë dhe atij të Financave. Dy ditë më parë në mbledhjen e Komitetit të Planifikimit të Strategjive, Berisha dhe Bode kanë pasur dy qëndrime të kundërta, lidhur me rritjen ekonomike të vendit. Gjatë kësaj mbledhje Kryeministri Berisha ka ndërhyrë, duke e kundërshtuar zv.ministrin i Financave, Florjon Mima, i tha se rritja ekonomike për tre tremujorët e parë të vitit të kaluar është 7.2%. Por kreu i Financave, Ridvan Bode theksoi se gjatë kontakteve, që ka pasur pikërisht me Institutin e Statistikave (INSTAT), rritja ekonomike për vitin e shkuar ishte shtatë deri në tetë për qind. “Ne kemi marrë kontakt me drejtoreshën e Statistikave dhe ata më kanë thënë që rritja vjetore mund të jetë në kufijtë 7 deri në 8 për qind”, është shprehur Bode. Por pavarësisht deklaratës së ministrit të Financave, Kryeministri Berisha nuk është tërhequr nga qëndrimi i tij, sipas të cilit rritja ekonomike është pikërisht ajo e certifikuar nga Fondi Monetar Ndërkombëtar.
Financat: Të ardhurat më pak se parashikimi
Të dhënat më të fundit nga Ministria e Financave tregojnë se niveli i të ardhurave deri në fund të muajit nëntor ka qenë më pak se parashikimi i bërë nga qeveria në fillim të vitit. Konkretisht deri në fund të nëntorit të ardhurat buxhetore gjithsej arritën në 262.5 miliardë lekë ose rreth 3.6% më pak se parashikimi dhe 15.9% më shumë se e njëjta periudhë e vitit të kaluar. Të ardhurat tatimore, po në fund të nëntorit, arritën në 239.4 miliardë lekë ose 3.9% më pak se parashikimi dhe 16.3% më shumë se e njëjta periudhë e vitit të kaluar. Ndërsa për sa i përket shpenzimeve të përgjithshme të buxhetit deri në fund të muajit nëntor arritën në 284.3 miliardë lekë ose 7.9% më pak se parashikimi ose 27.9% më shumë se e njëjta periudhë e vitit të kaluar. Sipas të dhë-nave nga financat shpenzimet korrente rezultuan me 5.7% më pak se parashikimi ose 12.4% më shumë se e njëjta periudhë e vitit të kaluar, ndërsa shpenzimet kapitale rezultuan 12.3% më pak se parashikimi, por 110.7% më shumë se e njëjta periudhë e vitit të kaluar.
|
|
|
|
|
|
|
PANORAMA & PANORAMA SPORT |
PANORAMA PLUS & UNE GRUAJA |
|
|