ILDKP gjobit 13 zyrtarë, padi zyrtares që s’justifikon 1.5 milionë USD

Apr 29, 2015 | 6:38

Inspektorati i Deklarimit dhe Kontrollit të Pasurive ka kallëzuar penalisht dhe ka gjobitur dje 13 zyrtarë të lartë të administratës shtetërore.

Zyrtarët akuzohen për “mosdeklarim të pasurisë”, “tentativë për fshehje të të ardhurave” dhe “pastrim të produkteve të veprës penale ose veprimtarisë kriminale”. Në listën e zyrtarëve të paditur, ILDKP-ja veçon rastin e ish- kryetares së Degës Doganore të Sarandës, Lina Vaso, e cila në deklaratën e pasurisë nuk ka arritur të justifikojë me dokumentacion shumën prej 1.5 milionë dollarësh. Sipas ILDKP-së, Prokuroria për këtë rast duhet të hetojë për vepra të tjera penale, veç asaj të fshehjes së pasurisë.

“Në veçanti për subjektin Lina Vaso, e cila ka ushtruar funksionin e kryetares së Degës Doganore Sarandë, pasuria e pajustifikuar me burime të ligjshme e së cilës shkon rreth 1.5 milionë dollarë, i është kërkuar Prokurorisë të hetojë edhe për ekzistencën e veprave të tjera penale të lidhura me nenin 257/2 të Kodit Penal”, thuhet në deklaratën e ILDKP.

Institucioni i drejtuar nga Shkëlqim Ganaj ka bërë me dije se për secilin nga zyrtarët që janë paditur, është njoftuar dhe kreu i institucionit epror për të marrë masa disiplinore ndaj personave që kanë fshehur pasuritë.

ZYRTARËT

Në listën e personave të paditur nga ILDKP janë dy gjyqtarët, Besnik Qira, që ushtron detyrën në Gjykatën e rrethit Kurbin dhe Tomorr Kulllo, gjyqtar në Gjykatën e Elbasanit. I paditur nga ILDKP është dhe Afrim Bakaj, i cili ushtron detyrën e drejtorit të Përgjithshëm të Autoritetit Kombëtar Ushqimor (AKU). Po ashtu dhe Dritan Manaj, i cili ushtron funksionin e drejtorit në Ministrinë e Zhvillimit Ekonomik, Turizmit dhe Tregtisë. Për fshehje pasurie akuzohet dhe Halit Xhafa, i cili është anëtar i Këshillit Mbikëqyrës së Bankës së Shqipërisë. Për ndjekje penale janë dërguar dhe pesë inspektorë të Tatim- Taksave, Aleks Neçaj, Albër Mihaj, Afrim Çupi, Admir Behari dhe Alfred Tusha. Po ashtu ILDKP ka dërguar për ndjekje penale dhe kryetarin e komunës Novoselë, Kanan Shakaj.