Antonio Konte kthen menjëherë faqe. Trajneri i Interit ka rinisur punën pas barazimit zhgënjyes kundër Slavia Pragës, sepse të shtunën dhe të mërkurën ka dy teste me një koeficient të lartë vështirësie: së pari derbi kundër Milanit, më pas sfida me Lacion.
NDESHJE KONTROLLI
Humori i Kontes kishte prekur fundin, edhe për këtë arsye dje u programua një ditë pune shumë intensive. Për lojtarët që luajtën kundër Slavias ishte parashikuar vetëm një stërvitje shkarkimi, ndërsa pjesa e mbetur në pasdite u angazhua në një ndeshje kontrolli kundër Komos. Mënyra e duhur, pra, për të pedaluar më fort, pikërisht ashtu siç Konte u ka kërkuar vazhdimisht lojtarëve.
TRE PËR T’U RIKUPERUAR
Mbrëmja e shëmtuar kundër Slavias është e shkuara, por ende nuk është harruar. Derbi i së shtunës në mbrëmje në “San Siro” është e ardhmja, e megjithatë që tani qëndron në plan të parë. Interi duhet të rikuperojë, ndërkohë, tre lojtarë thelbësorë që pas pauzës së kombëtarëve janë paraqitur nën nivel: Shkrinjar, Brozoviç dhe Lukaku ose, më saktë, elementët që formojnë shtyllën kurrizore interiste, të cilët në sfidën brenda qytetit do të paraqiten me bateritë e shkarkuara.
Rikthimi në formë do të jetë vendimtar për Konten. Shkrinjar dhe Brozo tërhoqën skuadrën gjatë sezonit të kaluar dhe e nisën mirë epokën “Konte”, megjithatë tani është i dukshëm një hap prapa. Sllovaku, i zhvendosur në të majtë në mbrojtjen me 3, ka treguar se nuk ndihet në rol si me Spaletin dhe një ulje e tregoi me Udinezen: dobët në markim, disi i shpërqendruar me topin në këmbë. Kundër Milanit, përjashto surprizat, do të luajë në mbrojtje përkrah Godinit dhe De Vrajt. Ndërsa kroati me Slavian ishte më i dobëti në fushë. Luajti 180 minuta me Kroacinë gjatë pauzës së Serisë A, ndoshta edhe lodhja ka ndikuar.
Përgatiti: LEDIO NASE
NDIQE LIVE "PANORAMA TV" © Panorama.al