Selena Gomez mund të jetë një nga njerëzit më të ndjekur në Instagram, por këngëtarja ka qëndruar larg rrjeteve sociale prej disa vitesh. Ajo poston rrallë dhe në shumicën e rasteve është stafi i saj që publikon foto apo video.
Së fundmi, Selena ka folur për momentin kur vendosi të heqë dorë nga mediat sociale.
Në një intervistë me “WWD”, këngëtarja tha se vendimi u mor tre vjet më parë, pjesërisht për shkak të nevojës së vazhdueshme për të qenë aktive gjatë gjithë kohës, breshërisë së informacionit, përqendrimit në jetën e saj personale dhe komenteve negative.
“Për të qenë e sinqertë, unë thjesht thoja: ‘Ky është shumë informacion’. Shumë detaje nga jeta ime personale ishin përhapur kudo dhe e kuptova se ishte e pakontrollueshme. Mendimet e mia dhe gjithçka që po konsumoja shkonin te miliona njerëz të ndryshëm në botë që thoshin gjëra të mira dhe të këqija. Dhe thjesht mendova: ‘Unë nuk marr asgjë prej tij (Instagram). Asgjë nuk po më jep jetë.’ Dhe thjesht u largova prej tij,”- shpjegoi ajo.
Selena tha se donte t’i fshinte profilet, por ekipi e këshilloi ndryshe.
“Unë jam e lumtur që nuk e bëra, sepse është një mënyrë kaq e mrekullueshme për të qëndruar e lidhur me njerëzit dhe kur e përdor më bën të lumtur, se jam plotësisht e sinqertë dhe e vërtetë,”– tha ajo.
Kur Selena dëshiron të postojë diçka, ajo ia dërgon një asistenti dhe ata e postojnë në profilet e saj. Këngëtarja thotë se vendimi për të hequr dorë nga bota e internetit, ia bëri jetën më të mirë në përgjithësi.
“Nuk jam plotësisht në dijeni të asaj që po ndodh në kulturën pop dhe kjo më bën vërtet të lumtur. Ndoshta kjo nuk i lumturon të tjerët, por mua me të vërtetë më shpëtoi jetën,“- përfundoi artistja.
Selena ka plot 268 milionë ndjekës, të cilët vazhdojnë ta mbështesin, edhe pse e dinë që ajo nuk poston vetë në rrjetet sociale.
