Stina e verës pasqyron edhe një tjetër realitet të trishtë në zonat bregdetare të Lezhës, realitet shumë i ndryshëm nga kronikat e pushuesve e turistëve nëpër shezlonge.
Janë fëmijët punëtorë, që, të detyruar nga varfëria deri në skamje e familjeve të tyre, u duhet të punojnë gjatë të gjithë sezonit për të fituar sadopak para.
FEMIJET
Me dhjetëra prej tyre zgjohen që në agim dhe ecin çdo ditë të ngarkuar me produktet e tyre, në kërkim të një blerësi që rri nën çadër. Misra, fiq, kumbulla e fruta të tjera të stinës janë të ngarkuara në kurriz të fëmijëve që nuk janë më shumë se 12 vjeç. Përshkimi i bregdetit në kulmin e temperaturave që shënojnë deri në 40 gradë, është një stërmundim për moshën e tyre.
Por ata janë të detyruar të përballojnë lodhjen dhe temperaturat e larta dhe të vazhdojnë të tregtojnë gjatë të gjithë ditës pasi duan të ndihmojnë familjet e tyre që jetojnë në kushte të vështira ekonomike. Këta fëmijë minorënë vijnë kryesisht nga zonat përreth Shëngjinit, por edhe nga Mirdita e Kurbini. Të gjithë sezonin turistik ata e kalojnë në Shëngjin me shpresën që të sigurojnë pak të ardhura.
Dita e tyre nis shumë herët dhe përfundon në mbrëmje vonë, por këta fëmijë nuk pyesin për vështirësitë më të cilat përballen, pasi qëllimi është që të sigurojnë para. Ata vinë çdo sezon turistik për tu vetëpunësuar në Shëngjin, por sipas tyre të ardhurat janë tepër të pakta duke i krahasur me lodhjen e tyre.
FITIMI
“Unë jam 11 vjeç dhe kam ardhur nga Mirdita këtu në Shëngjin për të shitur. Zgjohem që në orën 06:00 të mëngjesit për të shitur misër këtu në plazh. E përshkoj në këmbë të paktën dy herë të gjithë vijën bregdetare të Shëngjinit dhe lodhja është tepër e madhe”, shprehet i mituri me inicialet E.M. Ai e nis punën që në muajin maj, kur në Shëngjin vijnë edhe pushuesit e parë.
Ai thotë se e shumta mund të punojë edhe në shtator, më pas nis shkolla dhe e ka të pamundur të punojë. Një pjesë të parave që fiton me misrat, 11- vjeçari do t’i shpenzojë për të blerë librat dhe ndonjë rrobë të re për në shkollë. ELVIS HILA