Policia e Shtetit bën të ditur se do të jetë e pranishme në çdo ambient shkollor për të mbarëvajtur jo vetëm sigurinë, por edhe për të këshilluar të gjithë prindër e nxënës që të respektojnë masat anti-covid.
Në një dalje për mediat, Drejtori i Sigurisë në Policinë e Shtetit, Gjovalin Loka tha se policia do të jetë e pranishme për të parandaluar çdo akt kriminal, por njëkohësisht kërkoi bashkëpunimin e prindërve për të bërë prezentë çdo problematikë.
“Në të gjitha shkollat do të ketë prezence të policisë për parandalimin e çdo akti kriminal. Patrullat dhe policimi në komunitet do të jenë prezent në shkolla sidomos në orarin e mësimit, ndërrimit të turneve deri në përfundim të mësimit.
Policia e shtetit siguron nxënësit dhe prindërit se do të jetë e gatshme me realizimin e masave në shkolla dhe masave mbrojtëse anticovid.
Ne kërkojmë bashkëpunimin e tyre për të bërë prezent cdo problematikë që do të kenë.
Prezenca e policisë nuk do jetë vetëm për sigurinë, por edhe për masat anti-covid. Për këtë është edhe ky komunikim me mediave, për t’ia bërë të ditur prindërve që duhet të respektojnë distancimin social“, tha Loka.
