Pas lajmin për shtyrjen e negociatave të Shqipërisë në BE në qershor të 2019, deputetja e PD, Grida Duma, është shprehur se “kjo nuk është shtyrje, por mbyllje e negociatave”, duke shtuar më tej se kjo “provon se është koha që i ka mbaruar qeverisë shqiptare dhe humbja e një shansi të fundit”.
Reagimi i plotë i Dumës:
“Vendimi mbi negociatat për një dokument të ri deri në Qershor të 2019, është një sinjal i pastër rreziku i gjendjes së vendit.
Bashkimi Europian ka hartuar një dokument të ri.
Ky dokument i ri është qartazi një kushtëzim i fortë. Pakte dhe dokumenta të tilla bëhen detyruese vetëm kur qeveritë duket qartazi që po fshehin realitetin me dokumenta e raporte fiktive.
Fakti që kërkohet monitorim dhe kushtëzime në një dokument të ri duke thënë “të shohim dhe një vit tjetër çfarë ndodh” provon se kjo është koha që i ka mbaruar qeverisë shqiptare dhe humbja e një shansi të fundit.
Kjo nuk është shtyrje por mbyllje e negociatave, verdikti aktual është jo!
Ora që i kanë vënë kësaj qeverie është dhe një vit me kushte të rënda me kontroll të rëndë duke treguar që BE s’ka besim.
Hartimi i këtij dokumenti është prova që nuk ka më besim tek qeveria shqiptare dhe që ka filluar të numërohet ora pas.
Nëse do ishte një situate e vetëm mosplotësimit të reformave atëhere BE do të thoshte ridiskutojmë në 2019. Jo, situata është e rrezikshme sepse është hartuar një dokument i ri për të thënë “nuk ka më ku të lëvizni nga detyrimet”.
Sigurisht arsyet që çojnë në dokumenta të tilla janë gjithmonē tregues i një alarmi.
Dhe këto arsye nuk janë ato të zakonshmet por jashtë të zakonshmeve, arsye më të rënda se mos funksionim institucionesh, që do të thotë keqpërdorim institucionesh.”