Hetim edhe për dy punonjësit e agjencisë së këmbimit valutor, së cilës iu vodhën dy ditë më parë 180 mijë dollarë në dalje të “Hotel Sheraton” nga dy persona, që më pas u larguan me motor.
Burimet pranë grupit hetimor kanë konfirmuar për “Panorama.al” se po hetohen të gjitha lëvizjet e dy punonjësve të sigurisë së cilëve iu morën lekët.
Gjithashtu po kontrollohen edhe telefonatat dhe mesazhet që kanë kryer ata.
Sipas policisë, grabitësit kanë qenë të paarmatosur dhe të pamaskuar kur kanë grabitur shumën e parave.
Teksa ata i kanë zënë pritë punonjësve të sigurisë së këmbimit valutor, policia thotë se nga kqyrja e kamerave të sigurisë, duket se ata nuk kanë hasur në rezistencën e punonjësve.
Këto fakte, sipas policisë, bëjnë të dyshimtë rolin e punonjësve të agjencisë dhe ata janë të dyshuar për lidhje me ngjarjen dhe autorët.
