Drejtori i Përgjithshëm i Policisë së Shtetit Gledis Nano priti ditën e sotme në një takim kortezie, ambasadorin e Çekisë Jaroslav Ludva.
Ambasadori i Republikës çeke, Jaroslav Ludva, i shoqëruar nga Oficeri Ndërlidhës i Policisë çeke Adriatik Shino, ka zhvilluar një vizitë në Drejtorinë e Përgjithshme të Policisë së Shtetit, ku është pritur nga Drejtori i Përgjithshëm Gledis Nano.
Nano dhe Ludva kanë vlerësuar maksimalisht bashkëpunimin e deritanishëm dhe u dakordësuan për ta fuqizuar më tej këtë bashkëpunim.
Ambasadori Ludva i ka shprehur mbështetjen Drejtorit të Përgjithshëm Gledis Nano, për vijimin dhe për përmirësimin akoma më shumë të marrëdhënieve mes policisë shqiptare dhe asaj çeke, mbështetje që do të konsistojë në fushën e sigurisë rrugore, në trajnime, në bazë logjistike, në shkëmbime të informacioneve për grupe kriminale dhe në operacione të përbashkëta kundër krimit të organizuar.
Drejtori i Përgjithshëm Gledis Nano ka falënderuar ambasadorin dhe Oficerin e Kontaktit Adriatik Shino, për kontributin e tyre në mbështetjen që Policia çeke i ka dhënë Policisë shqiptare deri tani dhe ka siguruar ambasadorin për angazhim personal në forcimin e marrëdhënieve mes dy policive në të gjitha fushat me interes të përbashkët.
NDIQE LIVE "PANORAMA TV" © Panorama.al
