Gjyqi për 100 mijë euro/ Gjykata kërkonte adresën, Panuçi “i gjen” shtëpinë Nishanit

Oct 25, 2018 | 16:26
SHPËRNDAJE

Trajneri i ekipit kombëtar të futbollit, Kristian Panuçi duket se është i vendosur të zhvillojë sa më parë procesin gjyqësor që ka hapur ndaj ish-presidentit të Republikës, Bujar Nishani, të cilin e ka paditur për cënim të imazhit dhe personalitetit, duke i kërkuar 100 mijë euro dëmshpërblim.

Madje, kaq e madhe duket kjo dëshirë, sa që avokatët e Panuçit nuk kanë pritur zyrën e Gjendjes Civile që të gjejë adresën e Nishanit, por e kanë gjetur vet përpara dhe ia kanë vënë në dispozicion gjykatës.

panuci nishani

Këtë e konfirmon komunikimi që avokatët kanë me gjykatën, ku gjyqtarja e çështjes, Anila Karanxha ka vendosur që t’i rinisë njoftimin për deklaratën e mbrojtjes palës së paditur në bazë të adresës së depozituar nga pala paditëse.

Pra, ndonëse gjykata ia kishte kërkuar zyrës së Gjendjes Civile që të gjente adresën e ish-presidentit të Republikës, avokatët e Panuçit e kanë gjetur më parë këtë adresë duke ia vënë në dispozicion gjykatës brenda 3 ditëve.

Padia civile e trajnerit të kombëtares, Kristian Panuçi, ndaj ish-presidentit Nishani ka të bëjë me një reagim të ish-kreut të shtetit pas ndeshjes miqësore Kosovë-Shqipëri, ndeshje në të cilën Shqipëria u mund me rezultatin 3-0.

Pas kësaj ndeshje, Nishani reagoi me një deklaratë në rrjetet sociale, ku e ka cilësuar trajnerin Panuçi si një sharlatan që shkatërroi edhe atë që ishte ngritur. Për këtë reagim të ish-presidentit, trajneri i kombëtares Panuçi kërkon 100 mijë euro në formë dëmshpërblimi, për dëmin moral që i është shkaktuar figurës së tij në publik.

NDIQE LIVE "PANORAMA TV" © Panorama.al

Te lidhura