Demokristiani Mark Frroku nuk do të marrë pjesë në seancat plenare të Kuvendit dhe as në Komisionet Parlamentare të tij.
Vendimi është marrë sot nga Gjykata e Lartë, e cila rrëzoi kërkesën e Mark Frrokut, për të marrë pjesë në Kuvend.
Vetë avokati mbrojtës një seancë më parë e quajti të padrejtë moslejimin e deputetit për të qenë pjesë e seancave, duke njoftuar edhe ndërprerjen e pagës nga ana e administratës së Kuvendit.
Ndërkaq Kuvendi e ka çuar për interpretim në Kushtetuese vendimin për mandatin të deputetit të Shkodrës, Mark Frroku.
Ditën që u vendos që mandati i Frrokut të mos hiqej, në Konferencën e Kryetarëve palët kanë rënë dakord që për këtë çështje të shprehej Gjykata Kushtetuese.
Kryetari i Grupit të PD-së, Edi Paloka, e ka quajtur vendimin e Kuvendit si të habitshëm, pasi, sipas tij, ankimimin në Kushtetuese duhet ta bënte pala e prekur, në këtë rast deputeti Frroku dhe jo Parlamenti.
