Deputetja e PD Albana Vokshi ka reaguar pas lajmit se Drejtori i Përgjithshëm i RTSH-së, ka gjobitur gazetaren Anduena Llabani duke marrë masë disiplinore ndaj saj, me argumentimin se ka shkelur kontratën e punës duke dhënë intervistë për një media tjetër.
Ne nje reagim ne rrjetet sociale, Vokshi shkruan se arsyeja e vertete eshte se gjatë një interviste, gazetarja ka kritikuar qeverine për trafikun e drogës dhe zbuloi faktin se në hetimet e dosjes së Xibrakës ka dalë edhe emri i Olsi Ramës, vëllait të Kryeministrit Edi Rama.
“Në cilësinë e Kryetares së Komisionit Parlamentar të Medias unë i bëj thirrje Drejtorit Gëllçi të anullojë dënimin e tij antiligjor e të ndalë kërcënimet nga gazetarëve”, shkruan Vokshi.
POSTIMI I PLOTE:
STOP DHUNËS DHE SHANTAZHEVE NDAJ GAZETARËVE!!
GAZETARËT, QYTETARËT DHE NDËRKOMBËTARËT TË REAGOJNË!!
Në dt. 11 janar 2018, Anduena Llabani (Jaupi), gazetare e Radio Televizonit publik Shqiptar, gjatë një interviste në një media private, kritikoi qeverine për trafikun e drogës dhe zbuloi faktin se në hetimet e dosjes së Xibrakës ka dalë edhe emri i Olsi Ramës, vëllait të Kryeministrit Edi Rama.
Në hakmarrje ndaj saj, Drejtori i Përgjithshëm i RTSH-së, e ka gjobitur gazetaren Jaupi duke marrë masë disiplinore ndaj saj, me pretekstin se ka shkelur kontratën e punës duke dhënë intervistë për një media tjetër. Edhe pse kontrata ndalon vetëm punën me pagesë për televizione të tjera. Me shumë gjasa, ky është vetëm hapi i parë drejt pushimit nga puna të gazetares.
Thoma Gëllci, njihet nga të gjithë si mik i afrët i Olsi Ramës dhe shërbëtor i bindur i familjes kryeminsitrore. Madje ka qenë vëllai i Kryeministrit që e ka emëruar atë të postin e Drejtorit të RTSH. Nën drejtimin e tij, Radio dhe Televizioni Publik, që mbahen me paratë që paguajnë direkt shqiptarët për to, është kthyer në një makinë propagande dhe keqinformi me mbulimin e skandaleve dhe lidhjes së qeverisë me krimin. Gazetarët e tij censurohen, shantazhohen dhe madje dënohen siç është rasti i fundit nëse guxojnë të thonë të vërtetën apo të japin mendime të lira.
Dhuna dhe propaganda janë dy funksionet kryesore të çdo regjimi autokratik. Për koloninë e “ushtarëve të propogandës” që komentojnë e telefonojnë nga bodrumet e kryeministrisë për të bllokuar lajmet dhe për të gjobitur, kërcënuar, shantazhuar e pushuar nga puna gazetarët kritikë me qeverinë, shpenzohen miliona nga paratë publike.
Në cilësinë e Kryetares së Komisionit Parlamentar të Medias unë i bëj thirrje Drejtorit Gëllçi të anullojë dënimin e tij antiligjor e të ndalë kërcënimet nga gazetarëve.
Ju bëj thirrje njëkohësisht, të gjithë gazetarëve dhe qytetarëve të reagojnë dhe të jenë bashkë për të mos lejuar Kryeministrin dhe ushtarët e tij politikë të pushtojnë inatitucionet mediatike.
Bashkimi Europian e ka bërë të qartë që “Liria e medias është një vlerë thelbësore e BE-së dhe kusht i panegociueshëm për çdo vend që aplikon për t’u bërë shtet anëtar apo për çdo vend kandidat në rrugëtimin e vet drejt Bashkimit Europian”.
Ndaj i bëj thirrje delegacionit të BE në Tiranë dhe organizmave të tjerë ndërkombëtare, të reagojnë ndaj presionit të vazhueshëm, gjuhës fyese dhe kërcënimëvë të Kryeministrit ndaj mediave, gazetarëve dhe intelektualëve publikë.
NDIQE LIVE "PANORAMA TV" © Panorama.al